കല്‍പ്പറ്റ: തുടര്‍ച്ചയായി രണ്ടാം തവണയും കാലിക്കറ്റ് യൂനിവേഴ്‌സിറ്റി ഇന്റര്‍സോണ്‍ കലോത്സവത്തില്‍ സര്‍ഗപ്രതിഭാ പട്ടം നേടിയ കല്‍പ്പറ്റ ഗൂഡലായ്കുന്ന് ജുമാ മസ്ജിദ് ഖത്തീബ് കൂടിയായ അബ്ദുസ്സലാം വാഫി പുലിക്കാടിന് കല്‍പ്പറ്റ നുസ്‌റത്തുദ്ദീന്‍ മുസ്‌ലിം സംഘം മഹല്ല് കമ്മിറ്റിയുടെ ആദരം. അബ്ദുസ്സമദ് സമദാനി ഉപഹാരം നല്‍കി.
തൃശൂര്‍ ഗുരുവായൂര്‍ ശ്രീകൃഷ്ണ കോളജില്‍ നടന്ന കാലിക്കറ്റ് യൂനിവേഴ്‌സിറ്റി ഇന്റര്‍ സോണ്‍ കലോത്സവത്തില്‍ അറബിക് പ്രബന്ധ രചന, അറബിക് കവിത, അറബിക് കഥ എന്നിവയില്‍ ഒന്നാം സ്ഥാനവും ഉറുദു പ്രബന്ധം, ഉറുദു കവിത എന്നിവയില്‍ രണ്ടാം സ്ഥാനവും നേടിയാണ് അബ്ദുസലാം വാഫി തുടര്‍ച്ചയായി രണ്ടാം തവണയും സര്‍ഗ പ്രതിഭയായി തിരഞ്ഞെടുക്കപ്പെട്ടത്.
കഴിഞ്ഞ വര്‍ഷം കോഴിക്കോട് നടന്ന കലോത്സവത്തില്‍ അറബിക് കവിതയിലും അറബിക് കഥയിലും ഒന്നാം സ്ഥാനവും നേടി സാഹിത്യ പ്രതിഭാ പുരസ്‌കാരത്തിനും അര്‍ഹനായിരുന്നു.
മുട്ടിലില്‍ നടന്ന എഫ് സോണ്‍ കലോത്സവത്തില്‍ സര്‍ഗപ്രതിഭാ പട്ടവും ഈ പ്രതിഭക്ക് ലഭിച്ചിട്ടുണ്ട്.
മുട്ടില്‍ ഡബ്ല്യു.എം.ഒ ആര്‍ട്‌സ് ആന്‍ഡ് സയന്‍സ് കോളജിലെ എം.എ അറബിക് രണ്ടാം വര്‍ഷ വിദ്യാര്‍ഥിയാണ്. തരുവണ പുലിക്കാട് തിരുവങ്ങാടന്‍ മമ്മു- ബിയ്യാത്തു ദമ്പതികളുടെ മകനാണ്.