ലണ്ടന്‍: എഫ്.എ കപ്പ് ഫുട്‌ബോള്‍ പോരാട്ടത്തില്‍ മാഞ്ചസ്റ്റര്‍ യുനൈറ്റഡ്- ചെല്‍സി ഫൈനല്‍. സെമിയില്‍ മാഞ്ചസ്റ്റര്‍ യുനൈറ്റഡ് 2-1ന് ടോട്ടനം ഹോട്‌സ്പറിനേയും ചെല്‍സി 2-0ത്തിന് സതാംപ്ടനേയും വീഴ്ത്തി. മെയ് 19ന് ഫൈനല്‍ പോരാട്ടം അരങ്ങേറും.
കളിയുടെ 11ാം മിനുട്ടില്‍ ഡാലെ അല്ലിയുടെ ഗോളില്‍ ടോട്ടനം മുന്നിലെത്തിയെങ്കിലും 24ാം മിനുട്ടില്‍ അലക്‌സിസ് സാഞ്ചസ് മാഞ്ചസ്റ്ററിനെ ഒപ്പമെത്തിച്ചു. രണ്ടാം പകുതി തുടങ്ങി 62ാം മിനുട്ടില്‍ ആന്റര്‍ ഹെരേരയിലൂടെ മാഞ്ചസ്റ്റര്‍ വിജയം സ്വന്തമാക്കുകയായിരുന്നു.
രണ്ടാം പകുതിയില്‍ ഒലിവര്‍ ജിറൂദ്, ആല്‍വരോ മൊറാറ്റ എന്നിവര്‍ നേടിയ ഗോളിലാണ് ചെല്‍സിയുടെ വിജയം. ആദ്യ പകുതി ഗോള്‍രഹിതമായപ്പോള്‍ രണ്ടാം പകുതിയുടെ 46ാം മിനുട്ടില്‍ ജിറൂദും 82ാം മിനുട്ടില്‍ മൊറാറ്റയും വല ചലിപ്പിച്ചു.