പയ്യന്നൂര്‍: പോത്താംകണ്ടം ആനന്ദ ഭവനം പയ്യന്നൂരില്‍ സംഘടിപ്പിക്കുന്ന 41 ദിവസം നീണ്ടു നില്‍ക്കുന്ന പതിമൂന്നാമത് തുരീയം സംഗീതോത്സവം നാളെ തുടങ്ങും. അയോധ്യാ ഓഡിറ്റോറിയത്തില്‍ വൈകുന്നേരം ആറിനു കഥാകൃത്ത് ടി.പത്മനാഭന്‍ ഉദ്ഘാടനം ചെയ്യും. മലയാള സര്‍വകലാശാല വൈസ് ചാന്‍സലര്‍ കെ ജയകുമാര്‍, ഐ.ജി ദിനേന്ദ്ര കശ്യപ് മുഖ്യാതിഥികളാകും. നഗരസഭാ ചെയര്‍മാന്‍ അഡ്വ.ശശി വട്ടക്കൊവ്വല്‍ അധ്യക്ഷനാകും.
തുടര്‍ന്ന് മല്ലാടി സഹോദരന്മാരായ ശ്രീരാമ പ്രസാദും രവികുമാറും ചേര്‍ന്നു കച്ചേരി അവതരിപ്പിക്കും.
സമാപന ദിവസമായ 17 ന് രാവിലെ സ്വാമി കൃഷ്ണാനന്ദ ഭാരതിയുടെ നേതൃത്വത്തില്‍ പോത്താംകണ്ടം ആനന്ദ ഭവനം അവതരിപ്പിക്കുന്ന ഭജനാനന്ദം, വൈകുന്നേരം അഞ്ചിനു രാജന്‍ മിശ്ര സാജന്‍ മിശ്ര എന്നിവര്‍ ചേര്‍ന്ന് അവതരിപ്പിക്കുന്ന ഹിന്ദുസ്ഥാനി സംഗീതവും നടക്കും.
തുടര്‍ന്നു 7.30 നു നടക്കുന്ന സമാപന സമ്മേളനം നോവലിസ്റ്റ് എം മുകുന്ദന്‍, കഥാകൃത്ത് ടി പത്മനാഭന്‍,  ദിനേന്ദ്ര കശ്യപ്, സൂര്യാ കൃഷ്ണമൂര്‍ത്തി, സുപ്രീതി എന്നിവര്‍ ചേര്‍ന്ന് ഉദ്ഘാടനം ചെയ്യും. രാത്രി 8.30ന് പഞ്ചരത്‌ന കീര്‍ത്തനാലാപനം നടക്കും.