കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ തീര്‍ഥാടനത്തിന് പോകാന്‍ അവസരം ലഭിച്ചവര്‍ക്കുള്ള രണ്ടാംഗഡു തുക നിശ്ചയിച്ചു. ഗ്രീന്‍ കാറ്റഗറിയില്‍ അപേക്ഷിച്ചര്‍ 1,75,350 രൂപയും, അസീസിയ്യ കാറ്റഗറിയിലുള്ളവര്‍ 1,41,200 രൂപയും മെയ് 23നകം അടക്കണം.
ആദ്യ ഗഡുവായ 81,000 രൂപക്ക് പുറമെയാണിത്. ബലികര്‍മത്തിന് കൂപ്പണിന് അപേക്ഷിച്ചവര്‍ 8,000 രൂപ അധികം നല്‍കണം. ഹജ്ജ്, ഉംറ നിര്‍വഹിച്ചവരാണെങ്കില്‍ രണ്ടായിരം റിയാലിന് തുല്യമായ അധിക തുകയും ഇതിന് പുറമെ നല്‍കണം.
ഹജ്ജിന് ഈ വര്‍ഷം സബ്‌സിഡി ഒഴിവാക്കിയതോടെയാണ് നിരക്ക് കൂടിയത്. കഴിഞ്ഞ വര്‍ഷത്തേക്കാള്‍ 20,000 രൂപയിലധികം വര്‍ധനയാണ് ഓരോവിഭാഗത്തിലുമുള്ളത്. ഗ്രീന്‍ കാറ്റഗറയില്‍ അപേക്ഷിച്ചര്‍ക്ക് ഈവര്‍ഷം 2,56,350 രൂപയാണ് ചെലവ് വരിക. കഴിഞ്ഞ വര്‍ഷം 2,35,800 രൂപയായിരുന്നു. അസീസിയ്യ കാറ്റഗറിയിലുളളവര്‍ക്ക് 2,22,200 രൂപ ചെലവ് വരും. കഴിഞ്ഞ വര്‍ഷം 2,01,750 രൂപയായിരുന്നു.
കൊച്ചിയില്‍ നിന്നുള്ള വിമാന യാത്രാകൂലിയിലും ഈ വര്‍ഷംവര്‍ധനവുണ്ടായിട്ടുണ്ട്.
എയര്‍പോര്‍ട്ട് ടാക്‌സ് അടക്കം ഈ വര്‍ഷം 74,750 രൂപയാണ്. കഴിഞ്ഞ വര്‍ഷം 72,812 രൂപയായിരുന്നു.