കൊട്ടിയം: സ്വകാര്യ ലാബിലെ ജീവനക്കാരിയായ പെണ്‍കുട്ടിയെ ഇത്തിക്കരയാറ്റില്‍ മരിച്ച നിലയില്‍ കണ്ടെത്തിയ സംഭവവുമായി ബന്ധപ്പെട്ട് സ്റ്റുഡിയോ ഉടമയായ യുവാവിനെ കൊട്ടിയം പൊലിസ് അറസ്റ്റ് ചെയ്തു.
വെളിനല്ലൂര്‍ മീയന മൈലോട് സിത്താര ഹൗസില്‍ ജെനിത്ത് (29) ആണ് അറസ്റ്റിലായത്. ആത്മഹത്യപ്രേരണ, സ്ത്രീത്വത്തെ അപമാനിക്കല്‍, പുറകേ നടന്ന് ശല്യപ്പെടുത്തല്‍ എന്നീ വകുപ്പുകള്‍ പ്രകാരമാണ് ഇയാളെ അറസ്റ്റ് ചെയ്തത്.
കൊട്ടിയത്തെ സ്വകാര്യ ലാബിലെ ജീവനക്കാരിയായിരുന്ന വിജിയെ പതിനെട്ടാം തീയതി കാണാതായതിനെ തുടര്‍ന്ന് ബന്ധുക്കള്‍ കൊട്ടിയം പൊലിസില്‍ പരാതി നല്‍കിയിരുന്നു.
പൊലിസ് കേസെടുത്ത് അന്വേഷണം നടത്തി വരുന്നതിനിടെയാണ് പെണ്‍കുട്ടിയുടെ മൃതദേഹം കണ്ടെത്തിയത്.
കൊട്ടിയത്തെ ഒരു പെട്രോള്‍ പമ്പില്‍നിന്നു ലഭിച്ച സി.സി ടി.വി ദൃശ്യങ്ങളാണ് പ്രതിയെ പിടികൂടാന്‍ സഹായിച്ചത്. മൂവാറ്റുപുഴ, എറണാകുളം ഭാഗങ്ങളില്‍ ഒളിവില്‍ കഴിഞ്ഞിരുന്ന ഇയാളെ പൂയപ്പള്ളിയില്‍ നിന്നാണ് പൊലിസ് പിടികൂടിയത്.
ചാത്തന്നൂര്‍ എ.സി.പി ജവഹര്‍ ജനാര്‍ദിന്റെ മേല്‍നോട്ടത്തില്‍ നടന്ന അന്വേഷണത്തിന് കൊട്ടിയം ഇന്‍സ്‌പെക്ടര്‍ അജയ് നാഥ്, എസ്.ഐമാരായ അനൂപ്, തൃദീപ് ചന്ദ്രന്‍, സുന്ദരേശന്‍ എന്നിവര്‍ നേതൃത്വം നല്‍കി.