കുറ്റ്യാടി: മേഖലയില്‍ നിന്നും സംഭരിക്കുന്ന വിത്തുതേങ്ങയ്ക്ക് നല്‍കുമെന്ന് പറഞ്ഞ വില നല്‍കിയില്ലെങ്കില്‍ കര്‍ഷകരെ അണിനിരത്തി പ്രക്ഷോഭം നടത്തുമെന്ന് കാവിലുംപാറ ബ്ലോക്ക് കോണ്‍ഗ്രസ് കമ്മിറ്റി. മലയോര മേഖലയിലെ കേരകര്‍ഷകരുടെ ഏകപ്രതീക്ഷയാണ് വിത്തുതേങ്ങ സംഭരണം. ഏതാനും മാസങ്ങള്‍ക്ക് മുന്‍പ് കാവിലുംപാറയില്‍ സ്ഥലം എം.എല്‍.എയുടെ സാന്നിധ്യത്തില്‍ കൃഷി വകുപ്പ് ഉദ്യോഗസ്ഥരുടേയും ജനപ്രതിനിധികളുടേയും യോഗത്തില്‍ വച്ച് വിത്തുതേങ്ങ ഒന്നിന് എഴുപത് രൂപ എന്ന വില നിശ്ചയിച്ചിരുന്നു.
എന്നാല്‍ മേല്‍ നിശ്ചയിച്ച വില കര്‍ഷകര്‍ക്ക് ഇന്നേവരെ ലഭിച്ചിട്ടില്ല. ശക്തമായ സാമ്പത്തിക പ്രതിസന്ധി നേരിടുന്ന സമയത്ത് കര്‍ഷകരെ ദ്രോഹിക്കുന്ന നടപടികള്‍ പിന്‍വലിക്കണം. കഴിഞ്ഞ ദിവസങ്ങളില്‍ മലയോര മേഖലയില്‍ ശക്തമായി ആഞ്ഞടിച്ച ചുഴലിക്കാറ്റില്‍പെട്ട് വ്യാപകമായ കൃഷിനാശവും നിരവധി കര്‍ഷകരുടെ വീടുകളും തകര്‍ന്നിരിക്കുകയാണ്.
കൃഷിവകുപ്പ് അധികൃതര്‍ മലയോര മേഖലയില്‍ നേരിട്ടെത്തി കര്‍ഷകര്‍ക്ക് ആശ്വാസകരമായ നടപടികള്‍ സ്വീകരിക്കണമെന്നും കമ്മിറ്റി ആവശ്യപ്പെട്ടു. കെ.പി.സി.സി നിര്‍വാഹക സമിതിയംഗം കെ.ടി ജെയിംസ് ഉദ്ഘാടനം ചെയ്തു. പ്രസിഡന്റ് കോരങ്കോട്ട് മൊയ്തു അധ്യക്ഷനായി.