കുമളി: കുമളിയില്‍ രണ്ട് കഞ്ചാവ് കേസുകളിലായി മൂന്ന് യുവാക്കള്‍ അറസ്റ്റില്‍. ഒന്നേകാല്‍ കിലോഗ്രാം കഞ്ചാവുമായി അടിമാലി മന്നാങ്കണ്ടം പടിക്കപ്പ് രമേഷ് നിവാസില്‍ അജിത്ത് (22), മന്നാങ്കണ്ടം ഇരുമ്പുപാലം കരയില്‍ കൊല്ലമ്മാവ് കുടിയില്‍ വീട്ടില്‍ രാഹുല്‍ (23) എന്നിവരും 25 ഗ്രാം കഞ്ചാവുമായി കാഞ്ഞിരപ്പള്ളി കൂവപ്പള്ളി മണ്ണാര്‍ക്കയം കാവുങ്കല്‍ അജയും അറസ്റ്റിലായി.
അതേസമയം, സംസ്ഥാന അതിര്‍ത്തിയായ കുമളി വഴി കഞ്ചാവ് കടത്ത് വ്യാപകമായതായി കണക്കുകള്‍ വ്യക്തമാക്കുന്നു. മൂന്ന് ദിവസം കൊണ്ട് 5 കേസുകളും 12 പ്രതികളും എക്‌സൈസ് പരിശോധനയില്‍ പിടിയിലായി. ചെറുതും വലുതുമായ കേസുകളുടെ കണക്കാണിത്. സ്ഥിരമായി കഞ്ചാവ് ഉപയോഗിക്കുന്ന പെണ്‍കുട്ടിയടക്കം അഞ്ച് പേര്‍ ആദ്യം പിടിയിലായി. ഞായറാഴ്ച്ച കൊല്ലം സ്വദേശി ജഹാംഗീറിനെയാണ് ഒരു കിലോ കഞ്ചാവ് കെ.എസ്.ആര്‍.ടി.സി ബസില്‍ കടത്താന്‍ ശ്രമിക്കവെ എക്‌സൈസ് പിടികൂടിയത്. ഇന്നലെ പിടിയിലായ അടിമാലി സ്വദേശികള്‍ കഞ്ചാവ് വില്പനയ്ക്കായാണ് കഞ്ചാവ് കൊണ്ടുവന്നത്. ഇവര്‍ സഞ്ചരിച്ച ബൈക്കും എക്‌സൈസ് പിടികൂടി.
എക്‌സൈസ് ഉദ്യോഗസ്ഥര്‍ ചെക്ക് പോസ്റ്റില്‍ നടത്തിയ വാഹന പരിശോധനയ്ക്കിടെയാണ് ഇവര്‍ പിടിയിലാകുന്നത്. കേരളത്തിലേയ്ക്ക് വന്‍ തോതില്‍ കഞ്ചാവ് എത്തുന്നതോടെ എക്‌സൈസ് വകുപ്പും പരിശോധന കര്‍ശനമാക്കി. തമിഴ്‌നാട് കമ്പത്തും, തേനിയിലുമായി വന്‍ തോതില്‍ കഞ്ചാവ് ശേഖരിച്ചിരിക്കുന്നതായാണ് എക്‌സൈസിന് ലഭിച്ചിരിക്കുന്ന രഹസ്യ വിവരം. അതിര്‍ത്തി മേഖലയിലെ ചെക്ക് പോസ്റ്റിലും, സമാന്തര പാതകളിലും പരിശോധന കര്‍ശനമാക്കുന്നതിന് പുറമെ ഇരു സംസ്ഥാനങ്ങള്‍ ചേര്‍ന്ന് സംയുക്ത പരിശോധനയ്ക്ക് രൂപം നല്‍കുകയും ചെയ്തു.