ജമ്മു: കശ്മിരില്‍ എട്ടുവയസുകാരിയെ മയക്കുമരുന്ന് നല്‍കി ദിവസങ്ങളോളം പീഡിപ്പിച്ച് കൊലപ്പെടുത്തിയ സംഭവത്തില്‍ അറസ്റ്റിലായ പ്രതികളുടെ അഭിഭാഷകനെതിരേ ക്രൈം ബ്രാഞ്ച് നിയമനടപടിക്കൊരുങ്ങുന്നു. അന്വേഷണത്തെ വഴിതിരിച്ച് വിടുന്നതിനും യഥാര്‍ഥ പ്രതികളെ രക്ഷപ്പെടുത്താന്‍ ശ്രമിക്കുന്ന തരത്തിലുമുള്ള പ്രചാരണങ്ങള്‍ നടത്തുന്ന സാഹചര്യത്തിലാണ് പ്രതിഭാഗം അഭിഭാഷകനെതിരേ കോടതിയെ സമീപിക്കാന്‍ ക്രൈം ബ്രാഞ്ച് തീരുമാനിച്ചത്.
കുട്ടിയെ പീഡിപ്പിച്ച സംഭവത്തില്‍ പ്രതികളെ നിര്‍ബന്ധിച്ച് കുറ്റക്കാരാക്കുകയായിരുന്നുവെന്ന രീതിയില്‍ സി.ഡി പ്രചരിപ്പിച്ച് പ്രതികളെ രക്ഷപ്പെടുത്താനാണ് അഭിഭാഷകന്‍ ശ്രമിക്കുന്നത്. മുഖ്യപ്രതിയായ വിശാല്‍ ശര്‍മയുടെ പ്രസ്താവന ക്രൈംബ്രാഞ്ച് നിര്‍ബന്ധിച്ച് തയാറാക്കിയതാണെന്നും അഭിഭാഷകന്‍ പറയുന്നുണ്ട്. കേസിലെ മുഖ്യ ആസൂത്രകന്‍ സാഞ്ജി റാമിന്റെ മകനാണ് വിശാല്‍ ശര്‍മ. പ്രതികള്‍ നിരപരാധികളാണെന്നും ക്രൈംബ്രാഞ്ച് ഇവരെ കുറ്റക്കാരാക്കി മാറ്റുകയായിരുന്നുവെന്നും ചൂണ്ടിക്കാട്ടി അഭിഭാഷകന്‍ തയാറാക്കിയ സി.ഡി വ്യാപകമായി പ്രചരിച്ചതും അന്വേഷണത്തെ സാരമായി ബാധിച്ചതായി ക്രൈം ബ്രാഞ്ച് പറയുന്നു. ജനങ്ങളെ തെറ്റിദ്ധരിപ്പിച്ചും സര്‍ക്കാരിനെ പ്രതിസന്ധിയിലാക്കിയുമാണ് പ്രതിഭാഗം അഭിഭാഷകന്‍ പ്രവര്‍ത്തിക്കുന്നതെന്നും ക്രൈം ബ്രാഞ്ച് പറയുന്നു.
അതിനിടയില്‍ കേസില്‍ തങ്ങളെ അറസ്റ്റ് ചെയ്തത് തെറ്റായ വിവരത്തിന്റെ അടിസ്ഥാനത്തിലാണെന്ന് ആരോപിച്ച് അറസ്റ്റിലായ സബ് ഇന്‍സ്‌പെക്ടര്‍ ആനന്ദ് ദത്ത, സ്‌പെഷല്‍ പൊലിസ് ഓഫിസര്‍ ദീപക് ഖജൂരിയ എന്നിവര്‍ ജമ്മു കശ്മിര്‍ ഹൈക്കോടതിയില്‍ ഹരജി നല്‍കി.
ക്രൈംബ്രാഞ്ച് അന്വേഷണം ശരിയല്ലെന്നും ഇതിന് പകരമായി സി.ബി.ഐ അന്വേഷണം വേണമെന്നും ഇവര്‍ ഹരജിയില്‍ ആവശ്യപ്പെടുന്നു.