വാഷിങ്ടണ്‍: എച്ച് 1 ബി വിസാ നിയമത്തില്‍ വീണ്ടും മാറ്റങ്ങളുമായി അമേരിക്കന്‍ ഭരണകൂടം. എച്ച് 1 ബി വിസയിലെത്തുന്നവരുടെ പങ്കാളിക്ക് യു.എസില്‍ ജോലി ചെയ്യാമെന്ന വ്യവസ്ഥയാണ് പിന്‍വലിക്കാനൊരുങ്ങുന്നതെന്ന് അധികൃതര്‍ അറിയിച്ചു.
പുതിയ തീരുമാനം അമേരിക്കയിലുള്ള പതിനായിരക്കണക്കിന് ഇന്ത്യക്കാര്‍ക്ക് തിരിച്ചടിയായിരിക്കും. എച്ച് 4 വിസയാണ് വര്‍ക്ക് പെര്‍മിറ്റായി എച്ച് 1 ബി വിസയുള്ളവരുടെ പങ്കാളികള്‍ക്ക് നല്‍കാറുള്ളത്. മുന്‍ പ്രസിഡന്റ് ബറാക് ഒബാമയുടെ ഭരണകാലത്ത് കൊണ്ടുവന്ന പ്രത്യേക നിയമ പ്രകാരമാണ് എച്ച് 1 ബി വിസയിലെത്തുന്ന പങ്കാളിയെയും ജോലി ചെയ്യാന്‍ അനുവദിക്കുന്ന നിയമം നിര്‍മിച്ചത്. എന്നാല്‍ ഒബാമ നടപ്പാക്കിയ നിയമം പൂര്‍ണമായും എടുത്തുകളയുന്നതിന്റെ ഭാഗമായാണ് പുതിയ നീക്കം.
പുതിയ നിയമം ഉടന്‍ പ്രാബല്യത്തില്‍ വരുമെന്ന് യു.എസ് സിറ്റിസണ്‍ഷിപ്പ് ആന്‍ഡ് എമിഗ്രേഷന്‍ സര്‍വിസസ് ഡയരക്ടര്‍ ഫ്രാന്‍സിസ് സിസ്‌ന സെനറ്റര്‍മാര്‍ക്കയച്ച കത്തില്‍ പറയുന്നു. എന്നാല്‍ നിയമ പരിഷ്‌കരണവുമായി ബന്ധപ്പെട്ട അഭിപ്രായങ്ങളും നിര്‍ദേശങ്ങളും അറിയിക്കാന്‍ പൊതു ജനത്തിന് അവസരമുണ്ടെന്ന് സിസ്‌ന പറഞ്ഞു.
മൈഗ്രേഷന്‍ പോളിസി ഇന്‍സ്റ്റിറ്റ്യൂട്ടിന്റെ പഠനം അനുസരിച്ച് 71,000 പേര്‍ക്കാണ് യു.എസ് എച്ച് 1 ബി വിസ അനുവദിച്ചിരിക്കുന്നത്. ഇതില്‍ 90 ശതമാനവും ഇന്ത്യക്കാരാണ്.