തലശ്ശേരി: നിഹോണ്‍ ഷോട്ടോകാന്‍ ദേശീയ കരാട്ടെ ചാംപ്യന്‍ഷിപ്പില്‍ കേരള ടീം ഓവറോള്‍ ചാംപ്യന്‍മാരായി. ജാപ്പനീസ് ബൂഡോ കരാട്ടെ ഇന്റര്‍നാഷനലിന്റെയും നിഹോണ്‍ ഷോട്ടോകാന്‍ കരാട്ടെ ഫെഡറേഷന്‍ കേരളയുടെയും സംയുക്താഭിമുഖ്യത്തില്‍ തലശ്ശേരി സ്‌പോര്‍ട്‌സ് അരീന ഇന്‍ഡോര്‍ സ്റ്റേഡിയത്തില്‍ നടന്ന ചാംപ്യന്‍ഷിപ്പില്‍ വിവിധ സംസ്ഥാനങ്ങളില്‍ നിന്ന് പുരുഷ- വനിതാ വിഭാഗങ്ങളിലായി 200 ഓളം പേര്‍ പങ്കെടുത്തു. മഹാരാഷ്ട്ര രണ്ടാം സ്ഥാനവും കര്‍ണാടക മൂന്നാം സ്ഥാനവും നേടി. നിഹോണ്‍ ഷോട്ടോകാന്‍ കരാട്ടെ ഫെഡറേഷന്‍ വേള്‍ഡ് ചീഫ് ജപ്പാനിലെ ഷുസേക്കി ഷിഹാന്‍ പെംബാ തമാങ്ങ് ഓവറോള്‍ ചാംപ്യന്‍മാര്‍ക്കുള്ള ട്രോഫിയും റണ്ണേഴ്‌സ് അപ്പിനുള്ള ട്രോഫി ഗ്രാന്‍മാസ്റ്റര്‍ എസ്.കെ സിന്‍ഹയും വിതരണം ചെയ്തു. ഈ ചാംപ്യന്‍ഷിപ്പില്‍ നിന്ന് തിരഞ്ഞെടുക്കപ്പെട്ടവര്‍ നവംബറില്‍ ദുബൈയില്‍ നടക്കുന്ന വേള്‍ഡ് നിഹോണ്‍ ഷോട്ടോകാന്‍ കരാട്ടെ ചാംപ്യന്‍ഷിപ്പില്‍ പങ്കെടുക്കും. നഗരസഭാ ചെയര്‍മാന്‍ സി.കെ രമേശന്‍ മത്സരം ഉദ്ഘാടനം ചെയ്തു. പി.പി സുധേഷ് അധ്യക്ഷനായി. കൗണ്‍സിലര്‍മാരായ പി.പി സാജിത, പത്മജ രഘുനാഥ്, സെന്‍സായ് സി.എന്‍ മുരളി, അജിത് കാര്‍ക്കരെ സംസാരിച്ചു.