മുംബൈ: ബൗളര്‍മാര്‍ നിറഞ്ഞാടിയ പോരാട്ടത്തില്‍ മുംബൈ ഇന്ത്യന്‍സിനെ എറിഞ്ഞ് വീഴ്ത്തി സണ്‍റൈസേഴ്് ഹൈദരാബാദ് 31 റണ്‍സിന്റെ വിജയം സ്വന്തമാക്കി. ആദ്യം ബാറ്റ് ചെയ്ത ഹൈദരാബാദിനെ 18.4 ഓവറില്‍ 118 റണ്‍സില്‍ പുറത്താക്കിയ മുംബൈയെ 18.5 ഓവറില്‍ വെറും 87 റണ്‍സില്‍ എറിഞ്ഞൊതുക്കിയാണ് ഹൈദരാബാദ് തകര്‍പ്പന്‍ വിജയം സ്വന്തമാക്കിയത്. ആറ് കളികളില്‍ ഹൈദരാബാദ് നാലാം വിജയം സ്വന്തമാക്കിയപ്പോള്‍ ആറ് കളികളില്‍ മുംബൈയുടെ അഞ്ചാം തോല്‍വിയാണിത്.
മലയാളി താരം ബേസില്‍ തമ്പി സണ്‍റൈസേഴ്‌സിനായി ആദ്യമായി കളിക്കാനിറങ്ങിയ പോരാട്ടം കൂടിയായിരുന്നു മുംബൈക്കെതിരായ മത്സരം. മുംബൈക്ക് അനായാസം വിജയിക്കാമായിരുന്ന മത്സരം ഹൈദരാബാദിന്റെ പേസ്, സ്പിന്‍ ബൗളര്‍മാരുടെ മികവില്‍ ഇല്ലാതായി. പന്തെടുത്തവരെല്ലാം മികച്ച പ്രകടനം പുറത്തെടുത്തു. സ്പിന്‍ സൂപ്പര്‍ താരം റാഷിദ് ഖാന്‍ നാലോവറില്‍ 11 റണ്‍സ് മാത്രം വഴങ്ങി രണ്ട് വിക്കറ്റെടുത്തപ്പോള്‍ സിദ്ധാര്‍ഥ് കൗള്‍ മൂന്ന് വിക്കറ്റുകളെടുത്തു. ബേസില്‍ തമ്പി 1.5 ഓവറില്‍ വെറും നാല് റണ്‍സ് വഴങ്ങി രണ്ട് വിക്കറ്റുകള്‍ വീഴ്ത്തി.
മുംബൈക്കായി സൂര്യകുമാര്‍ യാദവ് 34 റണ്‍സും ക്രുണാല്‍ പാണ്ഡ്യ 24 റണ്‍സുമെടുത്തു. മറ്റൊരു താരത്തിനും രണ്ടക്കം കടക്കാന്‍ സാധിച്ചില്ല.
നേരത്തെ ടോസ് നേടി മുബൈ ബൗളിങ് തിരഞ്ഞെടുക്കുകയായിരുന്നു. മുംബൈ ബൗളര്‍മാരുടെ കണിശതയ്ക്ക് മുന്‍പില്‍ ഹൈദരാബാദ് ബാറ്റിങ് നിര റണ്‍സ് കണ്ടെത്താന്‍ വിഷമിച്ചു. 29 റണ്‍സ് വീതമെടുത്ത കെയ്ന്‍ വില്ല്യംസന്‍, യൂസുഫ് പത്താന്‍ എന്നിവര്‍ മാത്രമാണ് ഹൈദരാബാദിനായി തിളങ്ങിയത്. മക്ഗ്ലനാഗന്‍, ഹര്‍ദിക് പാണ്ഡ്യ, മയാങ്ക് മാര്‍കണ്ഡെ എന്നിവര്‍ രണ്ട് വീതം വിക്കറ്റുകളെടുത്തു.