ജിദ്ദ : ജിദ്ദയില്‍ നിന്ന് കെയ്‌റോയിലേക്കുള്ള യാത്രക്കിടെ മൊറോക്കോക്കാരിക്ക് വിമാനത്തില്‍ സുഖപ്രസവം.
ഇന്നലെ രാവിലെയാണ് 32കാരിയായ യാത്രക്കാരി ആണ്‍കുഞ്ഞിന് ജന്മം നല്‍കിയത്. രാവിലെ 5.47ന് ജിദ്ദയില്‍ നിന്ന് പറന്നുയര്‍ന്ന എസ്.വി 307ാം നമ്പര്‍ വിമാനത്തില്‍വച്ച് യുവതിക്ക് പ്രസവവേദന അനുഭവപ്പെടുകയായിരുന്നു. എയര്‍ഹോസ്റ്റസുമാരുടെ പരിചരണത്തില്‍ യുവതി വൈകാതെ കുഞ്ഞിന് ജന്മം നല്‍കി. കെയ്‌റോ എയര്‍പോര്‍ട്ട് എയര്‍ട്രാഫിക് കണ്‍ട്രോള്‍ ടവറുമായി ക്യാപ്റ്റന്‍ ബന്ധപ്പെട്ടതിനെ തുടര്‍ന്ന് പ്രാഥമിക ശുശ്രൂഷകള്‍ നല്‍കുന്നതിന് മെഡിക്കല്‍ സംഘം വിമാനത്താവളത്തില്‍ കാത്തുനിന്നിരുന്നു. വിമാനം ലാന്‍ഡ് ചെയ്തയുടന്‍ യുവതിയെയും കുഞ്ഞിനെയും ആംബുലന്‍സില്‍ എയര്‍പോര്‍ട്ടിന് സമീപമുള്ള ആശുപത്രിയിലേക്ക് മാറ്റി. വിമാനത്തിന്റെ ക്യാപ്റ്റനോടുള്ള ആദരസൂചകമായി അദ്ദേഹത്തിന്റെ പേരായ അബ്ദുറഹ്മാന്‍ എന്ന് കുഞ്ഞിന് യാത്രക്കാരി പേരിട്ടു.