കൊല്ലം: സി.പി.ഐ 23ാം പാര്‍ട്ടി കോണ്‍ഗ്രസിന് തുടക്കം കുറിച്ചു ജന. സെക്രട്ടറി എസ്. സുധാകര്‍ റെഡ്ഡി കടപ്പാക്കട സി.കെ ചന്ദ്രപ്പന്‍ നഗറില്‍ (സ്‌പോര്‍ട്‌സ് ക്ലബ് മൈതാനം) കൊടി ഉയര്‍ത്തി. പാര്‍ട്ടിയുടെ ദേശീയ നേതാക്കളടക്കം ആയിരങ്ങള്‍ പങ്കെടുത്തു.
കയ്യൂരില്‍നിന്നു ദേശീയ എക്‌സി. അംഗം ബിനോയ് വിശ്വത്തിന്റെ നേതൃത്വത്തില്‍ കൊണ്ടുവന്ന പതാക ദേശീയ സെക്രട്ടേറിയറ്റംഗം അതുല്‍ കുമാര്‍ അന്‍ജാന്‍, ധീരരക്തസാക്ഷികളുടെ നാടായ ശൂരനാട്ട് നിന്നു കെ.ആര്‍ ചന്ദ്രമോഹനന്റെ നേതൃത്വത്തില്‍ കൊണ്ടുവന്ന കൊടിമരം ദേശീയ സെക്രട്ടേറിയറ്റംഗം അമര്‍ജിത് കൗര്‍, കഴിഞ്ഞ പാര്‍ട്ടി കോണ്‍ഗ്രസ് നടന്ന പുതുച്ചേരിയില്‍നിന്ന് ആര്‍. വിശ്വനാഥന്റെ നേതൃത്വത്തില്‍ കൊണ്ടുവന്ന പതാക ഡെപ്യൂട്ടി ജന. സെക്രട്ടറി ഗുരുദാസ് ദാസ് ഗുപ്ത എന്നിവര്‍ ഏറ്റുവാങ്ങി.
വിപ്ലവ സ്മരണകള്‍ ഇരമ്പുന്ന വയലാറില്‍നിന്ന് പി. പ്രസാദിന്റെ നേതൃത്വത്തില്‍ അത്‌ലറ്റുകള്‍ കൊണ്ടുവന്ന ദീപശിഖ ആശ്രാമം എ.ബി ബര്‍ധന്‍ നഗറില്‍ (യൂനുസ് കണ്‍വന്‍ഷന്‍ ഹാള്‍) കേന്ദ്ര സെക്രട്ടേറിയറ്റ് അംഗമായ ഡി. രാജ ഏറ്റുവാങ്ങി ദീപശിഖാ മണ്ഡപത്തില്‍ രാജദീപം തെളിയിച്ചു. സംസ്ഥാന സെക്രട്ടറി കാനം രാജേന്ദ്രന്‍, ദേശീയ സെക്രട്ടേറിയറ്റംഗം പന്ന്യന്‍ രവീന്ദ്രന്‍, കെ.ഇ ഇസ്മാഈല്‍, ദേശീയ കൗണ്‍സിലംഗങ്ങളും സമ്മേളന പ്രതിനിധികളും ചടങ്ങില്‍ പങ്കെടുത്തു.