റിയാദ്: സഊദിയില്‍ ലോകോത്തര നിലവാരമുള്ള സ്‌പോര്‍ട്‌സ് കേന്ദ്രം വരുന്നു. രാജ്യത്തെ ഏറ്റവും വലിയ സാംസ്‌കാരിക, സ്‌പോര്‍ട്‌സ്, വിനോദ നഗരിയായ ഖിദിയ്യയുടെ ശിലാസ്ഥാപനം അടുത്ത ശനിയാഴ്ച നടക്കും.
സഊദി ഭരണാധികാരി സല്‍മാന്‍ ബിന്‍ അബ്ദുല്‍ അസീസ് രാജാവാണ് തറക്കല്ലിടല്‍ കര്‍മം നിര്‍വഹിക്കുക. 334 ചതുരശ്ര കിലോമീറ്റര്‍ വിസ്തീര്‍ണമുള്ള ഖിദിയ്യ പദ്ധതിയില്‍ സഫാരി മേഖലയുമുണ്ടാകും. ലോകത്തെ മുന്‍നിര അമ്യൂസ്‌മെന്റ് പാര്‍ക്ക് കമ്പനിയായ അമേരിക്കയിലെ സിക്‌സ് ഫ്‌ളാഗ്‌സിന്റെ സഹകരണത്തോടെയാണ് പാര്‍ക്ക് വരുന്നത്.
രാജ്യത്തെ ഏറ്റവും വലിയ വിനോദ പദ്ധതിയുടെ ഒന്നാംഘട്ട ഉദ്ഘാടനം 2022ല്‍ നടക്കുമെന്നാണ് പ്രതീക്ഷിക്കുന്നത്. ബില്യന്‍ കണക്കിന് ഡോളര്‍ ചെലവഴിച്ചു നിര്‍മിക്കുന്ന വിനോദ, സ്‌പോര്‍ട്‌സ് കേന്ദ്രം തൊഴില്‍ മേഖലയില്‍ പുത്തന്‍ പ്രതീക്ഷകളാണ് സമ്മാനിക്കുന്നത്.