മാലി: എ. എഫ്. സി കപ്പിലെ നിര്‍ണായക മത്സരത്തില്‍ ബംഗളൂരു എഫ്. സിക്ക് തോല്‍വി. മാല്‍ഡീവ്‌സിലെ ന്യൂ റാഡിയന്റ് എഫ്. സിയോടാണ് എതിരില്ലാത്ത രണ്ട് ഗോളുകള്‍ക്ക് ബംഗളൂരു എഫ്. സി തോറ്റത്.
ഇന്ന് ജയിച്ചിരുന്നെങ്കില്‍ ബംഗളൂരുവിന് സെമി യോഗ്യത ഉറപ്പിക്കാമായിരുന്നു. 30-ാം മിനുട്ടില്‍ ഫാസിറും 47-ാം മിനുട്ടില്‍ അഷ്ഫാക്കുമാണ് ന്യൂ റാഡിയന്റ് എഫ്. സിക്ക് വേണ്ടി ഗോള്‍ നേടിയത്.
ഐ. എസ്. എല്‍, സൂപ്പര്‍ കപ്പ് വിജയങ്ങള്‍ക്ക് ശേഷം ബംഗളൂരു മോശം പ്രകടനമായിരുന്നു ഇന്നലെ പുറത്തെടുത്തത്. പരാജയപ്പെട്ടതോടെ ബംഗളൂരു എഫ്. സി രണ്ടാം സ്ഥാനത്തായി. ബംഗളൂരുവിനും ന്യൂ റാഡിയന്റ് എഫ്. സിക്കും ഒമ്പത് പോയിന്റ് വീതമാണുള്ളതെങ്കിലും ന്യൂ റാഡിയന്റാണ് ഒന്നാം സ്ഥാനത്ത് നില്‍ക്കുന്നത്. മറ്റൊരു മത്സരത്തില്‍ ഐസ്വാള്‍ എഫ്. സി എ. എഫ്. സി കപ്പിന്റെ പോയിന്റ് പട്ടികയില്‍ അക്കൗണ്ട് തുറന്നു.
ഗ്രൂപ്പിലെ നാലാം മത്സരത്തില്‍ ബംഗ്ലാദേശില്‍ നിന്നുള്ള ധാക്കാ അഭാനിയെ സമനിലയില്‍ തളച്ചതോടെയാണ് ഐസ്വാള്‍ എഫ്. സിക്ക് ടൂര്‍ണമെന്റി ആദ്യ പോയിന്റ് ലഭിച്ചത്. 1-1 എന്ന ഗോള്‍ നിലയിലാണ് കളി അവസാനിച്ചത്.
ധാക്ക അഭാനിക്ക് വേണ്ടി ഉനൊഹെയാണ് ഗോള്‍ നേടിയത്. 61-ാം മിനുട്ടില്‍ ആന്ദ്രെ ഇയൊണെസ്‌കിയാണ് ഐസ്വാളിന് വേണ്ടി സമനില ഗോള്‍ നേടിയത്. നേരത്തെ തന്നെ ഐസ്വാള്‍ നോക്കോട്ട് റൗണ്ടിലേക്ക് കടക്കില്ലെന്ന് ഉറപ്പായിരുന്നു. ഇനി ഐസ്വാളിന് ടൂര്‍ണമെന്റില്‍ പ്രതീക്ഷകളൊന്നും ബാക്കിയില്ല.