എടച്ചേരി: ഏറെ പുതുമകളോടെ അധ്യാപകരുടെ അവധിക്കാല പരിശീലനം ആരംഭിച്ചു. കേരളത്തിലെ എല്ലാ ജില്ലകളിലും ബി.ആര്‍.സി കള്‍ കേന്ദ്രീകരിച്ചു നടത്തുന്ന പരിശീലന പരിപാടിക്ക് എല്ലാ സെന്ററുകളിലും വിപുലമായ ഒരുക്കങ്ങളാണ് നടത്തിയത്. ലോവര്‍ പ്രൈമറി അധ്യാപകര്‍ക്കും അപ്പര്‍ പ്രൈമറി അധ്യാപകര്‍ക്കും പ്രത്യേകമായാണു പരിശീലനം നല്‍കുന്നത്.
മുന്‍ വര്‍ഷങ്ങളെ അപേക്ഷിച്ച് ഇത്തവണ ഇംഗ്ലീഷ് വിഷയത്തിനു കൂടുതല്‍ പ്രാധാന്യം നല്‍കിയിട്ടുണ്ട്. ഹലോ ഇംഗ്ലീഷ് എന്ന പേരില്‍ ലോവര്‍ പ്രൈമറി അധ്യാപകര്‍ക്ക് ഏഴുദിവസം നീണ്ടുനില്‍ക്കുന്ന പരിശീലനമാണ് നല്‍കുന്നത്. പൊതുവിദ്യാലയങ്ങളിലേക്ക് രക്ഷിതാക്കളെയും കുട്ടികളെയും ആകര്‍ഷിക്കുക എന്ന ഉദ്ദേശ്യത്തോടെയാണ് ഇംഗ്ലീഷ് ഭാഷയ്ക്കു പ്രത്യേക പ്രാധാന്യം നല്‍കിയിരിക്കുന്നത്. നിലവിലുള്ള പാഠപുസ്തകങ്ങള്‍ മാത്രം പഠിപ്പിക്കുന്നതിലുപരി ആകര്‍ഷകങ്ങളായ കളികളിലൂടെയും പാട്ടുകളിലൂടെയും ഇംഗ്ലീഷ് ഭാഷ കുട്ടികളിലെത്തിക്കുന്ന രീതിയിലാണ് അധ്യാപകര്‍ക്ക് ഹലോ ഇംഗ്ലീഷ് എന്ന പേരില്‍ പരിശീലനം നല്‍കുന്നത്.
ഇംഗ്ലീഷ് പരിശീലനത്തില്‍ പങ്കെടുക്കുന്ന അധ്യാപകര്‍ മറ്റു വിഷയങ്ങളുടെ പരിശീലനത്തില്‍ പങ്കെടുക്കേണ്ടതില്ലെന്ന് നേരത്തെ അറിയിച്ചിരുന്നു. അധ്യാപകരില്‍നിന്നു നല്ല പിന്തുണയാണ് മിക്ക ബി.ആര്‍.സികളിലും ലഭിച്ചത്. പഴയ കാലത്തെ ഡി.പി.ഇ.പി പദ്ധതിയെ അനുസ്മരിപ്പിക്കുംവിധം എല്ലാ വിഷയങ്ങള്‍ക്കും അനുയോജ്യമായ കളികളോടെയാണ് അധ്യാപകര്‍ക്ക് പരിശീലനം നല്‍കുന്നത്. അധ്യാപകര്‍ക്ക് പരിശീലനം നല്‍കേണ്ട ജില്ലാ റിസോഴ്‌സ് ഗ്രൂപ്പിനുള്ള ട്രെയിനിങ് കഴിഞ്ഞ തിങ്കളാഴ്ചയോടെ ജില്ലാ കേന്ദ്രങ്ങളില്‍ പൂര്‍ത്തിയായി.
അതേസമയം ഡി.ആര്‍.ജി പരിശീലനത്തില്‍ അധ്യാപകര്‍ പലയിടങ്ങളിലും വേണ്ടത്ര പങ്കെടുത്തിട്ടില്ല. പങ്കെടുത്തവര്‍ തന്നെ ബി.ആര്‍.സി അധികൃതരുടെ നിര്‍ബന്ധത്തിനു വഴങ്ങിയാണെന്നും നേരത്തെ തന്നെ അഭിപ്രായമുണ്ടായിരുന്നു.
കളികള്‍ അടിസ്ഥാനമാക്കി നടത്തുന്ന പരിശീലനമാകയാല്‍ ഓരോ സെന്ററിലും വിപുലമായ മുന്നൊരുക്കങ്ങള്‍ നത്തേണ്ടതുണ്ട്. ജില്ലാതല ആര്‍.പി മാര്‍ക്കുള്ള പരിശീലനത്തില്‍ ഇരുപതിനും ഇരുപത്തഞ്ചിനും ഇടയിലുള്ളവരാണ് പങ്കെടുത്തത്. എന്നാല്‍ ഒരു സാധാരണ ക്ലാസ്മുറിയില്‍ ഗ്രൂപ്പ് തിരിഞ്ഞ് കളിരീതിയിലുള്ള പരിശീലന പരിപാടിക്ക് ഏറെ അസൗകര്യമുണ്ടായിരുന്നു.
ബി.ആര്‍.സി തലത്തില്‍ അന്‍പതിനും അറുപതിനും ഇടയിലായിരിക്കും പങ്കാളികളുടെ എണ്ണം .ഇത്രയും പേര്‍ക്ക് ഒരു ക്ലാസ്മുറിയില്‍ പരിശീലനം നല്‍കുക പ്രയാസമായിരിക്കും. അധ്യാപക പരിശീലന പരിപാടിയില്‍ പങ്കെടുക്കുന്നവരുടെ എണ്ണം കുറയ്ക്കുകയോ സ്ഥലലഭ്യത വര്‍ധിപ്പിക്കുകയോ ചെയ്തില്ലെങ്കില്‍ പരിശീലനം വേണ്ടത്ര വിജയപ്രദ മാവില്ലെന്നാണ് പൊതുവെയുള്ള വിലയിരുത്തല്‍.