ബെയ്ജിങ്: ചൈനയില്‍ സ്‌കൂള്‍വിട്ട് വീട്ടിലേക്കു പോകുകയായിരുന്നു വിദ്യാര്‍ഥികള്‍ക്കുനേരെ കത്തിയാക്രമണം. വടക്കന്‍ ചൈനയിലെ ഷാന്‍ഷി പ്രവിശ്യയിലുള്ള മിഴി കൗണ്ടിയില്‍ ഇന്നലെ വൈകിട്ട് 6.10നാണു സംഭവം. ആക്രമണത്തില്‍ ഏഴു വിദ്യാര്‍ഥികള്‍ കൊല്ലപ്പെട്ടു. 12 പേര്‍ക്ക് പരുക്കേല്‍ക്കുകയും ചെയ്തു.
അടുത്തിടെ ചൈനയില്‍ നടക്കുന്ന ഏറ്റവും ഭീകരമായ ആക്രമണമാണിത്. അക്രമിയെ പിടികൂടിയതായി പൊലിസ് അറിയിച്ചു. കൊല്ലപ്പെട്ട വിദ്യാര്‍ഥികളുടെ പ്രായം വ്യക്തമല്ല. 12നും 15നും ഇടയില്‍ പ്രായമുള്ളവരാണ് ആക്രമണത്തിനിരയായതെന്നാണു ലഭിക്കുന്ന വിവരം.
കഴിഞ്ഞ ഫെബ്രുവരിയില്‍ ചൈനീസ് തലസ്ഥാനമായ ബെയ്ജിങ്ങില്‍ ഒരു ഷോപ്പിങ് മാളില്‍ ഭീകരന്‍ നടത്തിയ കത്തിയാക്രമണത്തില്‍ ഒരു സ്ത്രീ കൊല്ലപ്പെടുകയും 12ഓളം പേര്‍ക്ക് പരുക്കേല്‍ക്കുകയും ചെയ്തിരുന്നു.
കഴിഞ്ഞ വര്‍ഷം അവസാനത്തില്‍ ഷെന്‍സെന്‍ നഗരത്തില്‍ മറ്റൊരു ഭീകരന്‍ നടത്തിയ കത്തിയാക്രമണത്തില്‍ രണ്ടുപേര്‍ കൊല്ലപ്പെടുകയും ഒന്‍പതു പേര്‍ക്കു പരുക്കേല്‍ക്കുകയും ചെയ്തു.