തിരുവനന്തപുരം: ആന്ധ്രയില്‍ നിന്ന് മൊത്തമായി കഞ്ചാവ് എത്തിക്കുന്ന വന്‍ സംഘത്തെ തിരുവനന്തപുരം സിറ്റി ഷാഡോ പൊലിസ് പിടികൂടി. ജില്ലയില്‍ കഞ്ചാവ് എത്തിക്കുന്ന സംഘത്തെക്കുറിച്ച് വിവരം ലഭിച്ചതിന്റെ അടിസ്ഥാനത്തില്‍ പ്രത്യേക സംഘം മാസങ്ങളായി ഇവരുടെ നീക്കങ്ങള്‍ ശ്രദ്ധിച്ച് ഇവരെ വലയിലാക്കുകയായിരുന്നു. തിരുവനന്തപുരം കല്ലിയൂര്‍, പെരിങ്ങമ്മല നെടിയവിള പുത്തന്‍വീട്ടില്‍ അഭിഷേക്(30), കല്ലിയൂര്‍ കാക്കാമൂല ഷാരോണ്‍ നിവാസില്‍ ശ്യാംരാജ്(29), ബാലരാമപുരം ആമച്ചല്‍ നട കടയറ നിതിന്‍(27) എന്നിവരാണ് 135 കിലോ കഞ്ചാവുമായി മെഡിക്കല്‍ കോളജ് ഭാഗത്തു വച്ച് ഷാഡോ പൊലിസിന്റെ പിടിയിലായത്.തിരുവനന്തപുരം സിറ്റി പൊലിസ് കമ്മിഷണര്‍ പി. പ്രകാശിന്റെ നിര്‍ദേശപ്രകാരം ഡി.സി. പി. ജയദേവ്, കണ്‍ട്രോള്‍ റൂം അസിസ്റ്റന്റ് കമ്മിഷണര്‍ വി. സുരേഷ്‌കുമാര്‍, മെഡിക്കല്‍ കോളജ് സി.ഐ ബിനുകുമാര്‍, എസ്.ഐ ഗിരിലാല്‍, സിറ്റി ഷാഡോ എ.എസ്.ഐമാരായ ഗോപകുമാര്‍, അരുണ്‍കുമാര്‍, യശോധരന്‍, സിറ്റി ഷാഡോ ടീം അംഗങ്ങള്‍ എന്നിവരാണ് അറസ്റ്റിനും അന്വേഷണത്തിനും നേതൃത്വം നല്‍കിയത്.