കോഴിക്കോട്: കൊടുചൂടില്‍ കരിഞ്ഞുണങ്ങിയ കോഴിക്കോട് കോര്‍പറേഷന്‍ സ്റ്റേഡിയത്തിലെ പുല്‍ത്തകിടിയില്‍ ഗോള്‍ വര്‍ഷവുമായി ക്വാര്‍ട്‌സ് എഫ് സി. കേരള പ്രീമിയര്‍ ലീഗില്‍ ഇന്നലെ നടന്ന മത്സരത്തില്‍ സെന്‍ട്രല്‍ എക്‌സൈസിനെ ഒന്നിനെതിരേ അഞ്ച് ഗോളുകള്‍ക്ക് വീഴ്ത്തിയാണ് ക്വാര്‍ട്‌സ് വിജയം തുടര്‍ന്നത്. 19, 35, 57, 66 മിനുട്ടുകളില്‍ ക്വാര്‍ട്‌സിന്റെ ഘാനക്കാരന്‍ ഇമ്മാനുവലാണ് നാല് ഗോളുകളും വലയിലാക്കിയത്.
കളിയുടെ 75ാം മിനുട്ടില്‍ പകരക്കാനായിറങ്ങിയ അയ്ഷ്മാന്‍ ശേഷിച്ച ഗോള്‍ സ്‌കോര്‍ ചെയ്തു. 38ാം മിനുട്ടില്‍ അദീഷ് ബഷീറാണ് സെന്‍ട്രല്‍ എക്‌സൈസിന്റെ ആശ്വാസ ഗോള്‍ നേടിയത്. ലഭിച്ച അവസരങ്ങളെ ഓരോന്നായി ലക്ഷ്യത്തിലെത്തിച്ച് ഇമ്മാനുവല്‍ കളിയിലെ താരമായി.
കെ പി എല്ലില്‍ ഒരു എവേ മത്സരമുള്‍പ്പടെ നാല് മത്സരം കളിച്ചതില്‍ നാലിലും ജയം നേടി ക്വാര്‍ട്‌സ് ഗ്രൂപ്പില്‍ ഒന്നാമതാണ്. മുന്‍ ഇന്ത്യന്‍ ക്യാപ്റ്റന്‍ കള്‍ട്ടന്‍ ചാപ്മാന്‍ പരിശീലിപ്പിക്കുന്ന ടീം സൂപ്പര്‍ താരങ്ങളില്ലാതെയാണ് നേട്ടങ്ങള്‍ സ്വന്തമാക്കുന്നത്.
നേരത്തെ സന്തോഷ് ട്രോഫി താരങ്ങളുമായി ഇറങ്ങിയ എസ്.ബി.ഐ ടീമിനേയും ഐ ലീഗ് താരങ്ങളുമായി ഇറങ്ങിയ ഗോകുലത്തേയും ക്വാര്‍ട്‌സ് പരാജയപ്പെടുത്തിയിരുന്നു. 30ന് നടക്കുന്ന മത്സരത്തില്‍ ഗോകുലം എസ്.ബി.ഐയെ നേരിടും.