ലണ്ടന്‍: തുടക്കത്തില്‍ തന്നെ പത്ത് പേരായി ചുരുങ്ങിയിട്ടും ആഴ്‌സണലിനെതിരേ സമനില പൊരുതി നേടി അത്‌ലറ്റിക്കോ മാഡ്രിഡ്. യുവേഫ യൂറോപ്പ ലീഗ് പോരാട്ടത്തിന്റെ ആദ്യപാദ സെമിയില്‍ കരുത്തരായ ആഴ്‌സണലും അത്‌ലറ്റിക്കോ മാഡ്രിഡും 1-1ന് സമനിലയില്‍ പിരിഞ്ഞു. മറ്റൊരു മത്സരത്തില്‍ ഒളിംപിക് മാഴ്‌സ സ്വന്തം തട്ടകത്തില്‍ മറുപടിയില്ലാത്ത രണ്ട് ഗോളുകള്‍ക്ക് റെഡ്ബുള്‍ സ്‌ലാസ്ബര്‍ഗിനെ വീഴ്ത്തി ഫൈനല്‍ പ്രതീക്ഷ സജീവമാക്കി.
കളി തുടങ്ങി പത്താം മിനുട്ടില്‍ തന്നെ അത്‌ലറ്റിക്കോ മാഡ്രിഡിന് പ്രതിരോധ താരം സിമെ വാസ്‌ലികോയെ നഷ്ടപ്പെട്ടു. അപകടകരമായ ഫൗളുകളെ തുടര്‍ന്ന് രണ്ട് മഞ്ഞ കാര്‍ഡ് കണ്ടതോടെയാണ് താരത്തിന് പുറത്ത് പോകേണ്ടി വന്നത്. രണ്ടാം മിനുട്ടിലാണ് താരം ആദ്യ മഞ്ഞ കാര്‍ഡ് കണ്ടത്. ഇതിനെതിരേ വന്‍ പ്രതിഷേധം നടത്തിയ കോച്ച് സിമിയോണിയേയും റഫറി മൈതാനത്ത് നിന്ന് പുറത്താക്കി. ഇത്രയൊക്കെ സംഭവിച്ചിട്ടും ആഴ്‌സണലിനെ അവരുടെ തട്ടകത്തില്‍ സമനിലയില്‍ കുരുക്കാനും ഒപ്പം ഒരു എവേ ഗോളിന്റെ അധിക ആനുകൂല്യം സ്വന്തമാക്കാനും സാധിച്ചാണ് ആത്‌ലറ്റിക്കോ ഒന്നാംപാദം അവസാനിപ്പിച്ചത്.
മത്സരത്തിന്റെ തുടക്കത്തില്‍ തന്നെ പത്ത് പേരായി ചുരുങ്ങിയതോടെ പൊതുവേയുള്ള പ്രതിരോധം കൂടുതല്‍ കടുപ്പിച്ചാണ് അത്‌ലറ്റിക്കോ നിലകൊണ്ടത്. ആദ്യ പകുതിയില്‍ ആഴ്‌സണലിന് ഒരു ഗോള്‍ പോലും നേടാന്‍ സാധിച്ചില്ല. രണ്ടാം പകുതി തുടങ്ങി 61ാം മിനുട്ടില്‍ ലക്കാസറ്റെയാണ് പ്രതിരോധ കോട്ടയില്‍ വിള്ളലുണ്ടാക്കി ടീമിനെ മുന്നില്‍ കടത്തിയത്. ജാക് വില്‍ഷെയറാണ് ഗോളിന് വഴിയൊരുക്കിയത്. എന്നാല്‍ ആഴ്‌സണലിന് സ്വന്തം തട്ടകത്തില്‍ ലഭിച്ച ആനുകൂല്യം മുതലാക്കാന്‍ സാധിക്കാതെ പോയത് കളിയില്‍ നിര്‍ണായകമായി. അവസാനത്തോടടുത്ത സമയത്ത് അവര്‍ പ്രതിരോധത്തില്‍ കാണിച്ച അലംഭാവം മുതലെടുത്ത് അന്റോയിന്‍ ഗ്രിസ്മാന്‍ 82ാം മിനുട്ടില്‍ ടീമിന് നിര്‍ണായക ഗോളിലൂടെ സമനിലയൊരുക്കുകയായിരുന്നു.
മത്സരത്തില്‍ ഏറ്റവും കൂടുതല്‍ പന്ത് കൈവശം വച്ചത് ആഴ്‌സണലായിരുന്നു. 76 ശതമാനമാണ് അവരുടെ പൊസഷന്‍. 13 തവണ അവര്‍ ഗോളിനടുത്തെത്തിയപ്പോള്‍ ഇതില്‍ എട്ടെണ്ണമാണ് ലക്ഷ്യത്തിലേക്ക് പോയത്. അത്‌ലറ്റിയാകട്ടെ അഞ്ച് തവണ മാത്രമാണ് ഗണ്ണേഴ്‌സ് മേഖലയില്‍ പന്തെത്തിച്ച് ഗോളിനായി ശ്രമിച്ചത്. മെയ് മൂന്നിന് അരങ്ങേറുന്ന രണ്ടാംപാദ പോരാട്ടത്തില്‍ സ്വന്തം തട്ടകത്തില്‍ കളിക്കുന്നതിന്റെ ആനുകൂല്യം മുതലാക്കമെന്ന പ്രതീക്ഷയിലാണ് സ്പാനിഷ് കരുത്തര്‍. യൂറോപ്പ ലീഗ് കിരീട നേട്ടത്തോടെ ആഴ്‌സന്‍ വെങര്‍ക്ക് ഉചിതമായ വിടവാങ്ങല്‍ നല്‍കാന്‍ അടുത്ത ഘട്ടത്തില്‍ ആഴ്‌സണല്‍ താരങ്ങള്‍ ജീവന്‍മരണ പോരാട്ടം പുറത്തെടുക്കണം. ഗോള്‍രഹിത സമനില പോലും അത്‌ലറ്റിക്കോയ്ക്ക് ഫൈനല്‍ സാധ്യത നല്‍കുന്നതിനാല്‍ പ്രത്യേകിച്ചും.