കൊച്ചി: കൊച്ചി മുനിസിപ്പല്‍ കോര്‍പറേഷന്റെ റോള്‍ ഓണ്‍ റോള്‍ ഓഫ് (റോ റോ) ജങ്കാര്‍ സര്‍വീസ് ഇന്ന് രാവിലെ 9ന് ഫോര്‍ട്ട്‌കൊച്ചി ജെട്ടിക്ക് സമീപം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും.
മന്ത്രി കെ.ടി ജലീല്‍ അധ്യക്ഷനാകും. എം.പിമാര്‍, എം.എല്‍.എമാര്‍, മുതിര്‍ന്ന ഉദ്യോഗസ്ഥര്‍ തുടങ്ങിയവര്‍ സംബന്ധിക്കും. പൊതുഗതാഗത സംവിധാനത്തിന്റെ ഭാഗമായി ജലഗതാഗത മേഖലയില്‍ റോള്‍ ഓണ്‍ റോള്‍ ഓഫ് വെസലുകളുടെ സഹായത്തോടെ ഫെറി സര്‍വീസ് നടത്തുന്ന ഇന്ത്യയിലെ ആദ്യത്തെ തദേശ സ്വയംഭരണ സ്ഥാപനമാവുകയാണ് കൊച്ചി മുനിസിപ്പല്‍ കോര്‍പറേഷനെന്ന് മേയര്‍ സൗമിനി ജയിന്‍ വാര്‍ത്താസമ്മേളനത്തില്‍ പറഞ്ഞു.
കൊച്ചിന്‍ ഷിപ്പ്‌യാര്‍ഡിന്റെ സാങ്കേതിക സഹായത്തോടെ ഏഴുകോടി 98 ലക്ഷം രൂപ ചെലവഴിച്ച് രണ്ട് റോറോ വെസലുകളാണ് സര്‍വീസ് നടത്തുന്നതിന് നിര്‍മിച്ചിട്ടുള്ളത്. ഏഴുകോടി 73 ലക്ഷം രൂപ ചെലവഴിച്ച് ഏറ്റവും ആധുനിക രീതിയിലുള്ള റോറോ ജെട്ടികളുടെ നിര്‍മാണം പൂര്‍ത്തീകരിച്ചു.
സംസ്ഥാന പൊതുമേഖലാസ്ഥാപനമായ കെ.എസ്.ഐ.എന്‍.സിക്കാണ് സര്‍വീസ് നടത്തുന്നതിനുള്ള ചുമതല. ഒരേസമയം നാല് ലോറികള്‍ 12 കാര്‍, 50 യാത്രക്കാര്‍ എന്നിവയെ വഹിക്കും.