പാലക്കാട്: സംസ്ഥാനത്ത് പുതുക്കിയ ബസ് ചാര്‍ജ്ജ് നിലവില്‍ വന്നതിന് ശേഷം ഡിസല്‍ വിലയില്‍ മാത്രം 9 രൂപയോളം വര്‍ധിച്ച സാഹചര്യത്തില്‍ സ്വകാര്യ ബസുകളുടെ നിലനില്‍പ്പിന് സര്‍ക്കാര്‍ ഡീസല്‍ സബ്‌സിഡി നിരക്കില്‍ നല്‍കണമെന്ന് കേരള ബസ് ഓപ്പറേറ്റേഴ്‌സ് ഓര്‍ഗനൈസേഷന്‍ ആവശ്യപ്പെട്ടു. സര്‍ക്കാര്‍ ഇടപ്പെടാത്ത പക്ഷം സംസ്ഥാനത്തെ സ്വകാര്യ ബസുകള്‍ താല്‍കാലികമായി സര്‍വിസ് നിര്‍ത്തിവെക്കണം. ഡീസല്‍ വില നിയന്ത്രണമില്ലാതെ കുതിച്ചുയരുന്ന സാഹചര്യത്തില്‍ മിക്ക സ്വകാര്യ ബസുകളും മണ്ണെണ്ണ ഉപയോഗിച്ചാണ് സര്‍വിസ് നടത്തുന്നതെന്നും ഒരു വിഭാഗം സ്വകാര്യ ബസ് ഡ്രൈവര്‍മാര്‍ ആരോപണമുയര്‍ത്തുന്നുണ്ട്. ബസ് ചാര്‍ജ്ജ് വര്‍ധിപ്പിക്കുമ്പോള്‍ ഡീസലിന് 66 രൂപയായിരുന്നത് 71 രൂപയിലെത്തിയെന്നും നിലവിലെ സാഹചര്യത്തില്‍ നിരക്കുവര്‍ധന അപര്യാപ്തമാണെന്നും അദ്ദേഹം പറഞ്ഞു. വാഹനങ്ങള്‍ പലതും ലാഭകരമല്ലാത്ത ട്രിപ്പുകള്‍ നിര്‍ത്തിവെക്കുകയാണെന്നും ഡീസല്‍ വില വര്‍ദ്ധനവിന് ആനുപാതികമായി സ്‌പെയര്‍ പാര്‍ട്ടുകളുടെ വിലയിലും കാര്യമായ വര്‍ധനവുണ്ടായതും സ്വകാര്യ ബസുടമകളെ പ്രതിസന്ധിയിലാക്കുന്നുണ്ട്. ഇത്തരം സാഹചര്യത്തില്‍ ബസ് സര്‍വിസുകള്‍ ഉപേക്ഷിക്കുകയോ കുറഞ്ഞ നിരക്കില്‍ ഡീസല്‍ നല്‍കുന്നതിന് സര്‍ക്കാര്‍ സംവിധാനം ഏര്‍പെടുത്തുകയോ ചെയ്യണമെന്നും ഗോപിനാഥന്‍ ആവശ്യപ്പെട്ടു. ഇന്‍ഷ്വറന്‍സ് മേഖലകളിലും നികുതിയിനത്തിലും ഈ വര്‍ഷം വര്‍ധനവുണ്ടായ സാഹചര്യത്തില്‍ സംസ്ഥാന സര്‍ക്കാര്‍ അധികമായി ചുമത്തിയ സെസ് പിന്‍വലിക്കണമെന്നും അദ്ദേഹം ആവശ്യപ്പെട്ടു.