കണ്ണൂര്‍: ബംഗളൂരുവില്‍ നിന്ന് കണ്ണൂരിലേക്ക് സര്‍വിസ് നടത്തുകയായിരുന്ന ബസ് അഞ്ചംഗ സംഘം തട്ടിയെടുത്തു.
കഴിഞ്ഞ ദിവസം രാത്രി 10 മണിയോടെ മൈസൂരു സര്‍ക്കിളിലെ കെങ്കേരി രാജരാജേശ്വരി നഗറിലാണ് സംഭവം. ബംഗളൂരുവില്‍ നിന്ന് കണ്ണൂരിലേക്ക് പുറപ്പെട്ട കെ.എ 1 എ.ജി 636 റൂബി ലാമ ബസ് ആണ് സംഘം തട്ടിയെടുത്തത്. രണ്ട് ബൈക്കുകളിലായെത്തിയ സംഘമാണ് ആയുധം കാണിച്ച് ഭീഷണിപ്പെടുത്തി ബസ് അജ്ഞാത ഗോഡൗണിലെത്തിച്ചത്.
ആരെയും ഫോണ്‍ വിളിക്കരുതെന്നും പൊലിസിനെ അറിയിക്കരുതെന്നും പറഞ്ഞ് യാത്രക്കാരെ ഭീഷണിപ്പെടുത്തി. എന്നാല്‍ ചില യാത്രക്കാര്‍ തന്ത്രപരമായി പൊലിസിനെ വിവരമറിയിച്ചു.
ഇതോടെ രാജ രാജേശ്വരി നഗര്‍ പൊലിസ് സ്ഥലത്തെത്തി ബസും യാത്രക്കാരെയും മോചിപ്പിച്ചു. അക്രമി സംഘത്തെ അറസ്റ്റ് ചെയ്തിട്ടുണ്ട്. പുലര്‍ച്ചെ മൂന്ന് മണിയോടെയാണ് ബസ് സര്‍വിസ് പുനരാരംഭിച്ചത്. 40 യാത്രക്കാരാണ് ബസിലുണ്ടായിരുന്നത്. യാത്രക്കാര്‍ സുരക്ഷിതരാണ്. സ്വകാര്യ ധനകാര്യ സ്ഥാപനം നല്‍കിയ വായ്പ തിരിച്ചടവുമായി ബന്ധപ്പെട്ട പ്രശ്‌നങ്ങളാണ് ബസ് തട്ടിയെടുക്കാന്‍ കാരണമെന്നാണ് വിവരം.