ന്യൂഡല്‍ഹി: ഇന്ത്യയുടെ ഡബിള്‍സ് താരം രോഹന്‍ ബൊപ്പണ്ണ എ.ടി.പി റാങ്കിങില്‍ ആദ്യ പത്തില്‍ ഇടംപിടിച്ചു. ഫ്രഞ്ച് ഓപണിന്റെ ക്വാര്‍ട്ടറില്‍ കടന്നതോടെയാണ് താരത്തിന് ഈ നേട്ടം സ്വന്തമാക്കിയത്. ഇതോടെ റിയോ ഒളിംപിക്‌സിന് നേരിട്ട് യോഗ്യത ഉറപ്പിക്കാനും ബൊപ്പണ്ണയ്്ക്ക് സാധിച്ചു. കഴിഞ്ഞ വര്‍ഷത്തെ ചാംപ്യന്‍മാരായ മാര്‍സലോ മെലോ-ഇവാന്‍ ഡോഡിഗ് സഖ്യം സെമിയില്‍ തോറ്റതിനാലാണ് ആദ്യ പത്തില്‍ ഇടംപിടിക്കാന്‍ താരത്തിന് സാധിച്ചത്. ഇവര്‍ ഫൈനലിലെത്തിയിരുന്നെങ്കില്‍ ഒളിംപിക് യോഗ്യത താരത്തിന് നഷ്ടമാകുമായിരുന്നു. നേരിട്ട് യോഗ്യത നേടുന്ന താരത്തിന് ഡബിള്‍സില്‍ പങ്കാളിയെ സ്വയം തെരഞ്ഞെടുക്കാനുള്ള അവസരവുമുണ്ട്. ഈ സാഹചര്യത്തില്‍ ബൊപ്പണ്ണ വെറ്ററന്‍ താരവും ഫ്രഞ്ച് ഓപണ്‍ മിക്‌സഡ് ഡബിള്‍സ് ജേതാവുമായ ലിയാന്‍ഡര്‍ പെയ്‌സിനെ പങ്കാളിയായി തെരഞ്ഞെടുക്കാനും സാധ്യതയുണ്ട്.
അതേസമയം പെയ്‌സും റാങ്കിങില്‍ നില മെച്ചപ്പെടുത്തിയിട്ടുണ്ട്. 46ാം റാങ്കിലാണ് താരമിപ്പോള്‍. സിംഗിള്‍സില്‍ യൂകി ഭാംബ്രിക്ക് തിരിച്ചടിയേറ്റു. ആറു സ്ഥാനങ്ങള്‍ നഷ്ടപ്പെട്ട് 147ാം റാങ്കിലാണ് താരമിപ്പോള്‍.