ശ്രീകാര്യം: അലത്തറയില്‍ ഞായറാഴ്ച രാത്രി നടന്ന കോണ്‍ഗ്രസ് സി.പി.എം സംഘര്‍ഷത്തില്‍ മൂന്ന് പേര്‍ക്ക് പരുക്ക്.
യൂത്ത് കോണ്‍ഗ്രസ ് മെഡിക്കല്‍ കോളജ് മണ്ഡലം വൈസ് പ്രസിഡന്റ് അലത്തറ ധന്യാ ഭവനില്‍ അനീഷ് (30), പിതാവ് സുരേന്ദ്രന്‍ (60), മാതാവ് അാനന്ദവല്ലി (54) എന്നിവര്‍ക്കാണ് പരുക്കേറ്റത്. ഞായറാഴ്ച രാത്രിയായിരുന്നു സംഭവം. നിരവധി ബൈക്കുകളിലായെത്തിയ സംഘം വീട്ടില്‍ ഇരിക്കുകയായിരുന്ന അനീഷിനെ വീട്ടില്‍ കയറി മര്‍ദിച്ചു. ഇത് തടയാന്‍ ശ്രമിച്ച മാതാപിതാക്കളെയും മര്‍ദിച്ചുവെന്നും അനീഷ് ശ്രീകാര്യം പൊലിസിനു നല്‍കിയ പരാതിയില്‍ പറയുന്നു.
മാസങ്ങള്‍ക്ക് മുമ്പ് അലത്തറയിലും ശാസ്താംകോണത്തും സി.പി.എം കോണ്‍ഗ്രസ് സംഘര്‍ഷം നടന്നിരുന്നു . ഇതിന്റെ തുടര്‍ച്ചയാണ് ഞായറാഴ്ച നടന്ന സംഭവമെന്ന് പൊലിസ്
അറിയിച്ചു. സംഭവത്തെ തുടര്‍ന്നു ഇന്നലെ രാവിലെ 6 മുതല്‍ വൈകു 6 വരെ ശ്രീകാര്യത്ത് കോണ്‍ഗ്രസ് ഹര്‍ത്താല്‍ നടത്തി. സ്ഥലത്ത് വന്‍ പൊലിസ് സംഘം ഇന്നലെയും ക്യാംപ് ചെയ്തിരുന്നു.
ഡി.സി.സി. പ്രസിഡന്റ് കരകുളം കൃഷ്ണപിള്ള, എം.എ. വാഹീദ് തുടങ്ങിയവര്‍ സംഭവ സ്ഥലം സന്ദര്‍ശിച്ചു. സംഭവത്തില്‍ ശ്രീകാര്യം പൊലിസ് കേസെടുത്തിട്ടുണ്ട്.