റിയാദ്: തിങ്കളാഴ്ച വൈകുന്നേരം റിയാദ്ഖസീം എക്‌സ്പ്രസ് റോഡില്‍ ഉണ്ടായ റോഡപകടത്തില്‍ 15 പേര്‍ മരിച്ചു. 29 പേര്‍ക്ക് പരുക്കേറ്റിട്ടുണ്ട്.പരുക്കേറ്റവരില്‍ 5 പേരുടെ നില ഗുരുതരമാണ് . യാത്രക്കാരുമായി പോകുകയായിരുന്ന ബസ്സും ട്രക്കും കൂട്ടിയിടിച്ചാണ് അപകടം.

ഇടിയുടെ ആഘാതത്തില്‍ ഇരു വാഹനങ്ങള്‍ക്കും തീ പിടിക്കുകയും ചെയ്തു.നിരവധി പേര്‍ക്ക് ഗുരുതരമായ പരുക്കേല്‍ക്കുകയും തീപിടുത്തത്തില്‍ പൊള്ളലേല്‍ക്കുകയും ചെയ്തിരുന്നു.

നേരത്തെ 12 പേരുടെ മരണമാണ് റിപ്പോര്‍ട്ട് ചെയ്തിരുന്നത്. പിന്നീട് ബസിനടിയില്‍ നിന്നും കരിഞ്ഞ നിലയില്‍ 4 മൃതദേഹങ്ങള്‍ കൂടെ കണ്ടെത്തുകയായിരുന്നു .
15 ആംബുലന്‍സ് യൂണിറ്റുകളും 2 ആംബുലന്‍സ് ഹെലികോപ്റ്ററുകളും സംഭവസ്ഥലത്ത് എത്തിയിരുന്നു .

റിയാദ് ഗവര്‍ണര്‍ ഫൈസല്‍ ബിന് ബന്ദര്‍ രാജകുമാരന്‍ നേരിട്ട് ദുരന്ത രക്ഷാപ്രവര്‍ത്തനത്തിന് നേതൃത്വം നല്‍കി . റിയാദിലെ ആശുപത്രികള്‍ക്ക് ഗവര്‍ണര്‍ നേരിട്ട് വേണ്ട സഹായങ്ങള്‍ ചെയ്യാന്‍ ഉത്തരവിട്ടതായി ബന്ധപ്പെട്ട വൃത്തങ്ങള്‍ വെളിപ്പെടുത്തി .ആരോഗ്യ മന്ത്രാലയം റിയാദ് ആശുപത്രികള്‍ക്ക് അത്യാഹിത ദുരന്ത നിവാരണ നിര്‍ദേശം നല്‍കി. അപകടത്തില്‍പെട്ട വിദേശികളെ കുറിച്ച് കൂടുതല്‍ വിവരങ്ങള്‍ പുറത്തു വന്നിട്ടില്ല.