മാനന്തവാടി: മുതിര്‍ന്ന വിദ്യാര്‍ഥികളുടെ റാഗിങ്ങിനിരയായ നഴ്‌സിങ് വിദ്യാര്‍ഥി ആത്മഹത്യക്കു ശ്രമിച്ചു. മാനന്തവാടി താലൂക്കിലെ പീച്ചങ്ങോട് സ്വദേശിനിയാണ് സീനിയര്‍ വിദ്യാര്‍ഥികളുടെ റാഗിങ്ങിനിരയായി ആത്മഹത്യക്കു ശ്രമിച്ചത്. മെര്‍ക്കുറി ദ്രാവകം കഴിച്ചു ഗുരുതരാവസ്ഥയിലായ കുട്ടി കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലാണ്. സുല്‍ത്താന്‍ ബത്തേരി അസംപ്ഷന്‍ മിഷന്‍ ആശുപത്രിക്കു കീഴിലുള്ള നഴ്‌സിങ് വിദ്യാര്‍ഥികള്‍ താമസിക്കുന്ന ഹോസ്റ്റലില്‍ തിങ്കളാഴ്ച ഉച്ചയ്ക്കു മൂന്നിനാണ് അവശനിലയില്‍ വിദ്യാര്‍ഥിയെ കണ്ടത്.
തുടര്‍ന്നു സഹപാഠികളും ഹോസ്റ്റല്‍ അധികൃതരും ചേര്‍ന്നു കുട്ടിയെ ആശുപത്രിയിലെത്തിക്കുകയായിരുന്നു. കഴിഞ്ഞ സെപ്റ്റംബര്‍ മാസത്തിലാണു വിദ്യാര്‍ഥി അസംപ്ഷന്‍ മിഷന്‍ ആശുപത്രിയില്‍ നഴ്‌സിങ്ങിനു ചേര്‍ന്നത്. നിരവധി തവണ റാഗിങ്ങിനിരയായ കുട്ടി വിവരം ബന്ധുക്കളോടു പറയുകയും ചെയ്തിരുന്നു.
രക്ഷിതാക്കള്‍ വിവരം പലതവണ ഹോസ്റ്റല്‍ പ്രിന്‍സിപ്പലുടെ ശ്രദ്ധയില്‍പ്പെടുത്തിയെങ്കിലും യാതൊരു നടപടിയുമുണ്ടായില്ലെന്നു രക്ഷിതാക്കള്‍ ആരോപിച്ചു.