ചിക്കാഗോ: കോപ്പ അമേരിക്ക ഫുട്‌ബോളില്‍ കോസ്റ്ററിക്കയ്‌ക്കെതിരേ അമേരിക്കയ്ക്ക് സൂപ്പര്‍ വിജയം. ഏകപക്ഷീയമായ നാലു ഗോളിനാണ് അമേരിക്ക കോസ്റ്ററിക്കയെ തകര്‍ത്തത്. ആദ്യ പകുതിയില്‍ തന്നെ അമേരിക്ക മൂന്നു ഗോളടിച്ച് തങ്ങളുടെ വിജയം ഉറപ്പിച്ചിരുന്നു. ഒമ്പതാം മിനുറ്റില്‍ ക്ലിന്റ് ഡെംപ്‌സി, 37ാം മിനുറ്റില്‍ ജെറമയ്ന്‍ ജോണ്‍സ്, 42ാം മിനുറ്റില്‍ ബോബി വുഡ് എന്നിവര്‍ ആദ്യ പകുതിയില്‍ കോസ്റ്ററിക്കന്‍ വല ചലിപ്പിച്ചപ്പോള്‍ അതിലേക്ക് അവസാന ആണിയും അടിക്കുക മാത്രമാണ് 87ാം മിനുറ്റില്‍ ഗ്രാഹം സുസി ചെയ്തത്.
കളിയുടെ പകുതിയിലധികവും പന്ത് കോസ്റ്ററിക്കയുടെ കൈവശമായിരുന്നു ഉണ്ടായിരുന്നത്. എന്നാല്‍, വിജയം അമേരിക്കയുടെ കൈവശമായിരുന്നു. കളിയുടെ മിക്കയിടങ്ങളിലും കോസ്റ്ററിക്ക മികച്ചുനിന്നെങ്കിലും ഗോള്‍ നേടുക എന്നത് മാത്രം അവര്‍ക്ക് അകലെയായി. ആശ്വാസഗോളിനായി നിരവധി ശ്രമങ്ങള്‍ മല്‍സരത്തിന്റെ അവസാനത്തില്‍ ശ്രമിച്ചെങ്കിലും അവയെല്ലാം അമേരിക്കന്‍ പ്രതിരോധത്തില്‍ തട്ടിയകന്നു.