പൈനാവ്: വിദ്യാര്‍ഥികള്‍ക്ക് പ്രൈവറ്റ് ബസുകളില്‍ സുഗമമായി യാത്ര ചെയ്യുവാനും കണ്‍സഷനുമായി ബന്ധപ്പെട്ട് യാതൊരു ബുദ്ധിമുട്ടുണ്ടാകാതെ ആവശ്യമായ സൗകര്യം ഒരുക്കാനും ജാഗ്രത പുലര്‍ത്താനും പൊലിസ്, ആര്‍.ടി.ഒ അധികാരികള്‍ക്ക് ജില്ലാ കലക്ടര്‍ ഡോ.എ. കൗശിഗന്‍ നിര്‍ദേശം നല്‍കി.
കലക്ടറുടെ ചേമ്പറില്‍ ചേര്‍ന്ന സ്റ്റുഡന്റ്‌സ് ട്രാവല്‍ ഫെസിലിറ്റി കമ്മിറ്റിയുടെ യോഗത്തിലാണ് നിര്‍ദേശം നല്‍കിയത്. വിദ്യാര്‍ഥികളെ മന:പ്പൂര്‍വ്വം ബസില്‍ കയറ്റാതിരിക്കുകയോ യാത്രാക്ലേശം സൃഷ്ടിക്കുകയോ ചെയ്യുന്നതായി ശ്രദ്ധയില്‍പ്പെട്ടാല്‍ അതത് താലൂക്കിലെ ജോയിന്റ് ആര്‍.ടി.ഒമാരെ ബന്ധപ്പെട്ട് വിവരം ധരിപ്പിക്കാമെന്ന് ആര്‍.ടി.ഒ റോയി മാത്യു അറിയിച്ചു.
ഓരോ താലൂക്കുകളിലുമുള്ള ബന്ധപ്പെട്ട ജോയിന്റ് ആര്‍.ടി.ഒമാരുടെ ഫോണ്‍ ആര്‍.ടി. ഓഫീസ് ഇടുക്കി 8281786065, സബ് ആര്‍.ടി. ഓഫീസ്, ദേവികുളം 8547639068, സബ് ആര്‍.ടി. ഓഫീസ് ഉടുമ്പന്‍ചോല 8547639069, സബ് ആര്‍.ടി. ഓഫീസ് , തൊടുപുഴ 8547639038, സബ് ആര്‍.ടി. ഓഫീസ്, വണ്ടിപ്പെരിയാര്‍ 8547639037. വിദ്യാര്‍ഥികള്‍ക്കായുള്ള കണ്‍സഷന്‍ കാര്‍ഡ് വിതരണം കഴിഞ്ഞ വര്‍ഷത്തേതുപോലെ തന്നെ നടത്തുന്നതിന് തീരുമാനിച്ചു.