വടക്കഞ്ചേരി: ജനവാസകേന്ദ്രമായ കണക്കന്‍തുരുത്തിയില്‍ പുലിയിറങ്ങി. പുലിയെ മുഖാമുഖംകണ്ട യുവാവ് പേടിച്ചു ഓടുന്നതിനിടെ നിലത്തുവീണെങ്കിലും പരിക്കേല്ക്കാതെ രക്ഷപ്പെട്ടു. കണക്കന്‍തുരുത്തി പെരുമ്പാട്ട് ജോര്‍ജിന്റെ തോട്ടത്തിലാണ് ഇന്നലെ രാവിലെ പത്തോടെ പുലിയെ കണ്ടത്. ഇവിടെ അടുത്ത് പണിക്കുപോയിരുന്ന പല്ലാറോഡ് ജോയിയാണ് പുലിയെ കണ്ടു പേടിച്ചത്. വഴിക്കു കുറുകേ പെട്ടെന്നു പുലി പാഞ്ഞുപോകുകയായിരുന്നുവെന്ന് ജോയി പറഞ്ഞു. നിലത്തുവീണു കിടന്നിരുന്ന മാമ്പഴം എടുക്കുന്നതിനിടെയാണ് സംഭവം. പുലിയ കണ്ടു പേടിച്ച ഓടുന്നതിനിടെ ജോയ് വീണു. പിന്നേയും ഓടി പണി നടന്നിരുന്ന ജോര്‍ജിന്റെ വീട്ടില്‍ കയറി വാതില്‍ അടയ്ക്കുകയായിരുന്നു. ശബ്മുണ്ടാക്കാന്‍ കഴിയാതെ പിന്നീട് കുറച്ചുസമയം കഴിഞ്ഞാണ് ശബ്ദമുണ്ടാക്കി ആളുകളെ കൂട്ടിയത്. ഇവിടെ വീടുപണിക്കായി കൂട്ടിയിട്ടിരുന്ന പാറമണലില്‍ പുലിയുടെ കാല്‍പാട് പതിഞ്ഞിട്ടുണ്ട്. പെരുമ്പാട്ട് സെബാസ്റ്റ്യന്റെ തോട്ടത്തിലൂടെയാണ് പുലി ഓടിവന്നതെന്നു പറയുന്നു. ജനവാസകേന്ദ്രമായ ഇവിടെ പുലിയിറങ്ങുന്നതും ആദ്യമാണ്. പീച്ചി വന്യമൃഗ സംരക്ഷണകേന്ദ്രവുമായി അടുത്തുകിടക്കുന്ന പ്രദേശമാണിത്. എങ്കിലും അഞ്ചുകിലോമീറ്റര്‍ ദൂരെയാണ് സംരക്ഷണകേന്ദ്രത്തില്‍പെടുന്ന താമരപ്പിള്ളി ഉള്‍പ്പെടെയുള്ള പ്രദേശങ്ങളുള്ളത്. പുലിയിറങ്ങിയെന്ന വാര്‍ത്ത പരന്നതോടെ പ്രദേശത്തുകാര്‍ ഏറെ ഭീതിയിലാണ്. വിവരമറിഞ്ഞ് സെക്്ഷന്‍ ഫോറസ്റ്റ് ഓഫിസര്‍ എം ശശികുമാര്‍, ബീറ്റ് ഫോറസ്റ്റ് ഓഫിസര്‍ ബി സുബ്രഹ്്മണ്യന്‍ എന്നിവര്‍ സ്ഥലത്തെത്തി പരിശോധന നടത്തി. മഴയെ തുടര്‍ന്ന് കാല്‍പ്പാടുകള്‍ അവ്യക്തമായതിനാല്‍ നാട്ടിലെത്തിയത് പുലി തന്നെയാണോയെന്ന് പറയാനാകില്ലെന്നു വനപാലകര്‍ പറഞ്ഞു.