പാലക്കാട്: കഞ്ചാവു വില്‍പനയും വിതരണവും വന്‍തോതില്‍ നടക്കുന്ന ഒറ്റപ്പാലം, ഷൊര്‍ണൂര്‍ നഗരസഭാ പ്രദേശങ്ങളില്‍ പെണ്‍കുട്ടികളെയും ഇതിനായി ഉപയോഗിക്കുന്നതായി സൂചന. മയക്കുമരുന്ന് ഉപയോഗവും അനുബന്ധ കാര്യങ്ങളും വിശദമായി അന്വേഷിക്കുമെന്നും കഞ്ചാവ് ശൃംഖലയുടെ കണ്ണികളെ നിയമത്തിനുമുന്നില്‍ കൊണ്ടുവരുമെന്നും പൊലിസ് പറഞ്ഞു. വിദ്യാര്‍ഥികളെ ഉപയോഗിച്ച് കഞ്ചാവു വില്‍പന നടത്തുന്നതായി നേരത്തെ ബോധ്യപ്പെട്ടിരുന്നു. ഇതിന്റെ അടിസ്ഥാനത്തില്‍ പൊലിസ് അന്വേഷണം നടത്തിയിരുന്നുവെങ്കിലും ആരെയും പിടികൂടാന്‍ കഴിഞ്ഞിരുന്നില്ല. കോളജുകള്‍, ഹൈസ്‌കൂളുകള്‍, മറ്റു വിദ്യാഭ്യാസ സ്ഥാപനങ്ങള്‍ എന്നിവ കേന്ദ്രമാക്കി കഞ്ചാവുവില്‍പനയും ഉപയോഗവും നടക്കുന്നതായി നേരത്തെ കണ്ടെത്തിയിരുന്നു. സ്‌കൂള്‍ വിദ്യാര്‍ഥിനികളായ പെണ്‍കുട്ടികളെ കഞ്ചാവു മാഫിയ കഞ്ചാവു കൈമാറ്റത്തിനായി ഉപയോഗിക്കുന്നുണ്ടെന്ന് പൊലിസിനു വിവരം ലഭിച്ചിട്ടുണ്ട്. ഒറ്റപ്പാലം, ഷൊര്‍ണൂര്‍ റെയില്‍വേ സ്റ്റേഷനുകള്‍ കേന്ദ്രീകരിച്ചും നഗരങ്ങളിലുമാണ് പെണ്‍കുട്ടികള്‍ കഞ്ചാവു കൈമാറുന്നത്. ഇതു വഴി പോകുന്ന ചെറിയ ക്ലാസുകളില്‍ പഠിക്കുന്ന പെണ്‍കുട്ടികളുടെ കൈവശം കഞ്ചാവുപൊതികള്‍ കൊടുത്തുവിടുന്നതായാണ് വിവരം.
ആവശ്യക്കാര്‍ക്ക് കുട്ടിയുടെ വസ്ത്രത്തിന്റെ കളറും വിശദവിവരങ്ങളും നല്‍കും. ചെറിയ പൊതികളിലായി കഞ്ചാവു നല്‍കുന്നതിനാല്‍ ഇതെന്താണെന്ന് തിരിച്ചറിയാന്‍ കുട്ടികള്‍ക്കും കഴിയില്ല. പിടിക്കപ്പെടാതിരിക്കാന്‍ ഓരോദിവസവും കുട്ടികളെ മാറ്റിക്കൊണ്ടിരിക്കും. അവിശ്വസനീയമായി തോന്നാമെങ്കിലും ഈ യാഥാര്‍ഥ്യം ഉള്‍ക്കൊണ്ടേ മതിയാകൂവെന്നാണ് പൊലിസും പറയുന്നത്. ദിനംപ്രതി കഞ്ചാവിനു ആവശ്യക്കാര്‍ വര്‍ധിക്കുകയാണ്. ഒറ്റപ്പാലം, ഷൊര്‍ണൂര്‍ നഗരങ്ങളില്‍ എത്തുന്ന കഞ്ചാവ് ഇവിടെനിന്നാണ് തൃശൂര്‍, മലപ്പുറം ജില്ലകളിലേക്കു കടത്തുന്നത്. അന്യസംസ്ഥാനക്കാരായ തൊഴിലാളികളില്‍ അധികവും കഞ്ചാവിന്റെ ഉപയോക്താക്കളാണ്. കഞ്ചാവിന്റെ വരവും വില്‍പനയും ഈ ശൃംഖലയില്‍ പ്രവര്‍ത്തിക്കുന്ന കണ്ണികളെയും കുറിച്ച് വിശദമായ അന്വേഷണം നടന്നുവരികയാണെന്ന് ഷൊര്‍ണൂര്‍ എ.എസ.പി ജി ജയദേവ് പറഞ്ഞു. കഞ്ചാവു വില്‍പനയുമായി ബന്ധപ്പെട്ട് എക്‌സൈസ് വകുപ്പും പരിശോധന നടത്തുന്നുണ്ടെങ്കിലും കാര്യമായ പ്രയോജനമൊന്നും ഉണ്ടാകുന്നില്ല. ഒറ്റപ്പാലം, ഷൊര്‍ണൂര്‍ നഗരങ്ങള്‍ കഞ്ചാവിന്റെ താവളമായ സ്ഥിതിയാണ്. തമിഴ്‌നാട്ടില്‍ നിന്നാണ് ഇവിടേക്ക് കഞ്ചാവ് എത്തുന്നത്. ഇതുതടയാന്‍ ബന്ധപ്പെട്ടവര്‍ക്ക് കഴിയാറുമില്ല. അതിര്‍ത്തികടന്ന് ഊടുവഴികളിലൂടെയാണ് കഞ്ചാവ് ജില്ലയിലേക്ക് എത്തുന്നത്. ലൈന്‍ ബസുകളില്‍ ഉള്‍പ്പെടെ ഇവ കടത്തുന്നുണ്ട്. ബസുകളില്‍ പരിശോധനയില്ലാത്തതിനാല്‍ കഞ്ചാവു മാഫിയ കണ്ടെത്തിയ പുതിയ മാര്‍ഗം ഇതാണ്. മുന്‍കാലങ്ങളില്‍ ട്രെയിനുകളിലാണ് കഞ്ചാവ് കടത്തിയിരുന്നത്. സ്വകാര്യവാഹനങ്ങളിലും ടാക്‌സികളിലും മയക്കുമരുന്നുകളും കുഴല്‍പണവും അടക്കമുള്ള അവിഹിത ഇടപാടുകള്‍ തടയുന്നതിനു ഒരു പരിധിവരെ പൊലിസിന് കഴിഞ്ഞിരുന്നു. എന്നാല്‍ സ്വകാര്യ ബസുകളും കെ.എസ്.ആര്‍.ടി.സിയും അടക്കമുള്ള വാഹനങ്ങളില്‍ ഇവ കടത്തുന്നതു തടയാന്‍ അധികൃതര്‍ക്ക് കഴിയുന്നില്ല. പ്രായോഗികമായ ബുദ്ധിമുട്ടുതന്നെയാണ് ഇതിനു കാരണം.