തിരൂര്‍: വിദേശത്ത് നടന്ന പണമിടപാടില്‍ മധ്യവയസ്‌കനെ തട്ടിക്കൊണ്ടുപോയ യുവാവിനെ തിരൂര്‍ പൊലിസ് പിടികൂടി. നരിക്കുനി പുല്ലാനൂര്‍ അരോത്തുപാലം വീട്ടില്‍ അബ്ദുല്‍ബാസിത് (32)ആണ് പിടിയിലായത്. വെട്ടം കക്കയത്തെ കാവതിയായാട്ട് സുബ്രഹ്മണ്യനെയാണ് ബാസിത്  തട്ടിക്കൊണ്ടുപോയത്. പ്രതിയില്‍ നിന്നു സുബ്രഹ്മണ്യനെ മോചിപ്പിച്ച ശേഷം ബാസിതിനെ അറസ്റ്റ് ചെയ്യുകയായിരുന്നു. കോഴിക്കോട് സ്വദേശിയുമായി സുബ്രഹ്മണ്യന്‍ പണമിടപാട് നടത്തിയിരുന്നു. ഈ പണം ആവശ്യപ്പെട്ടാണ് ബാസിത് ക്വട്ടേഷനെടുത്ത് സുബ്രഹ്മണ്യനെ തട്ടികൊണ്ടുപോയത്. പിന്നീട് കുടുംബവുമായി മോചനത്തിനു പണം ആവശ്യപ്പെടാനായിരുന്നു ബാസിത്തിന്റെ നീക്കം. എന്നാല്‍ സുബ്രഹ്മണ്യന്റെ ബന്ധുക്കള്‍ നല്‍കിയ പരാതിയില്‍ തിരൂര്‍ പൊലിസ് തന്ത്രപൂര്‍വം സുബ്രഹ്മണ്യനെ മോചിപ്പിക്കുകയും ബാസിതിനെ പിടികൂടുകയുമായിരുന്നു. പ്രതിയെ കോടതിയില്‍ ഹാജരാക്കി.