ചേമ്പാടി: അയ്യംകൊല്ലി കുതിരവട്ടം ആദിവാസി ഗ്രാമത്തില്‍ പകര്‍ച്ചവ്യാധി പടര്‍ന്നുപിടിക്കുന്നു. ശരീരമാസകലം പ്രത്യേക തരം ചൊറിയാണ് പടരുന്നത്. അന്‍പതോളം ആദിവാസി കുടുംബങ്ങളാണ് ഗ്രാമത്തില്‍ താമസിക്കുന്നത്.
ചെറിയകുട്ടികള്‍ മുതല്‍ മുതിര്‍ന്നവര്‍ വരെയുള്ളവര്‍ക്ക് രോഗം പിടിച്ചിട്ടുണ്ട്. കുടുംബത്തിലെ ഒരംഗത്തിന് രോഗം ബാധിച്ചാല്‍ എല്ലാവര്‍ക്കും രോഗം പടര്‍ന്നുപിടിക്കുകയാണ്.
കുട്ടികള്‍ക്ക് സ്‌കൂളില്‍ പോകാന്‍ പോലും പറ്റാത്ത സ്ഥിതിയാണുള്ളത്. ആരോഗ്യവകുപ്പിന്റെ നേതൃത്വത്തില്‍ ഗ്രാമത്തില്‍ അടിയന്തര ചികിത്സാ സൗകര്യങ്ങള്‍ ലഭ്യമാക്കണമെന്നാണ് ഗ്രാമവാസികളുടെ ആവശ്യം.