തായ്‌പേ: തായ്‌വന്റെ പരമാധികാരം വിട്ടുകൊടുക്കില്ലെന്ന് പ്രഖ്യാപിച്ച് പ്രസിഡന്റ് സായ് ഇങ്-വെന്‍. ഏകീകരണത്തിനു ചൈന മുന്നോട്ടുവച്ച ഒരു രാജ്യം രണ്ടു വ്യവസ്ഥകള്‍ എന്ന നിര്‍ദേശം അംഗീകരിക്കാന്‍ കഴിയില്ലെന്നും അവര്‍ വ്യക്തമാക്കി. ഹോങ്കോങില്‍ പരാജയപ്പെട്ട പരീക്ഷണമാണിതെന്നും അവര്‍ പറഞ്ഞു.

തായ്‌വാന്‍ തങ്ങളുടെ പരിധിയിലാണെന്നാണ് ചൈനയുടെ വാദം. അത്യാവശ്യമാണെങ്കില്‍ സൈന്യത്തെ ഉപയോഗിച്ച് നിയന്ത്രണത്തിലാക്കുമെന്നുമാണ് ചൈനയുടെ നിലപാട്. എന്നാല്‍ തായ്‌വാന്‍ സ്വതന്ത്ര രാജ്യമാണെന്നും റിപ്പബ്ലിക് ഓഫ് ചൈന എന്നാണ് അതിന്റെ ഔദ്യോഗിക പേരെന്നും അവര്‍ വ്യക്തമാക്കി. ചൈനയില്‍ നിന്നു സമ്മര്‍ദ്ദമുള്ളതിനാല്‍ തായ്‌വാന്റെ സ്വാതന്ത്ര്യവും ജനാധിപത്യവും സംരക്ഷിക്കാന്‍ തന്റെ സര്‍ക്കാര്‍ ഒരു സംവിധാനം കെട്ടിപ്പടുക്കുമെന്നും അവര്‍ പറഞ്ഞു.

ഈ മാസം 11ന് നടക്കുന്ന പൊതു തെരഞ്ഞെടുപ്പില്‍ സായ് വീണ്ടും മല്‍സരിക്കുന്നുണ്ട്. ഹോങ്കോങില്‍ ചൈനീസ് വിരുദ്ധ പ്രക്ഷോഭം ശക്തായതിനാല്‍ ചൈനയില്‍ നിന്നുള്ള ഭീഷണിയാണ് പ്രധാന പ്രചാരണ ആയുധം. ചൈനയില്‍ സ്വതന്ത്രമാവണമെങ്കില്‍ യുദ്ധത്തിന് തയ്യറായിക്കൊള്ളാന്‍ ചൈന നേരത്തെ തായ്‌വാനെ ഭീഷണിപ്പെടുത്തിയിരുന്നു. എന്നാല്‍ ചൈനയില്‍ നിന്നുള്ള ഭീഷണികളെ നേരിടുന്നതിന് തായ്‌വാന്‍ പാര്‍ലമെന്റ് നുഴഞ്ഞു കയറ്റ വിരുദ്ധ നിയമം പാസാക്കിയിട്ടുണ്ട്.