വണ്ടൂര്‍: മതിലുകള്‍ വേര്‍തിരിവിന്റെ പ്രതീകമാണെന്നും ജാതിയുടെയും അയിത്തത്തിന്റെയും വിഭാഗീയതയുടെയും മതില്‍ക്കെട്ടുകള്‍ തകര്‍ത്തെറിഞ്ഞ നാട്ടില്‍ മതില്‍കെട്ടി വീണ്ടും വര്‍ഗീയ ധ്രുവീകരണം നടത്തുകയാണ് ഇടത് സര്‍ക്കാരെന്നും എ. പി അനില്‍കുമാര്‍ എം.എല്‍.എ. വനിതാ മതിലിനെതിരേ വണ്ടൂര്‍ മണ്ഡലം കോണ്‍ഗ്രസ് കമ്മിറ്റി വാണിയമ്പലത്തു നടത്തിയ നവോത്ഥാന സദസ് ഉദ്ഘാടനം ചെയ്യുകയായിരുന്നു അദ്ദേഹം .
നവോത്ഥാനം ഹൈന്ദവര്‍ക്കു മാത്രം അവകാശപ്പെട്ടതല്ലെന്നും മുസ്‌ലിം, ക്രിസ്ത്യന്‍ വിഭാഗങ്ങളെ ഒഴിവാക്കി നാവോത്ഥാനം സാധ്യമല്ലെന്നും അദ്ദേഹം പറഞ്ഞു. പി. അബ്ദുസലാം ഏമങ്ങാട് അധ്യക്ഷനായി. ഡി.സി.സി വൈസ് പ്രസിഡന്റ് അഡ്വ. ബാബു മോഹനകുറുപ്പ് മുഖ്യപ്രഭാഷണം നടത്തി. കെ.സി കുഞ്ഞിമുഹമ്മദ്, സി.കെ മുബാറക്, കെ.ടി അജ്മല്‍, എം. രാമചന്ദ്രന്‍, വി.എം നാണി, കാപ്പില്‍ മുരളി സംസാരിച്ചു.