തിരുവനന്തപുരം: സി.ബി.എസ്.ഇ വിദ്യാര്‍ഥികളുടെ ഹാജര്‍ ചട്ടം പരിഷ്‌കരിച്ചതോടെ പൊതു പരീക്ഷയ്ക്കിരിക്കുന്ന പത്താം ക്ലാസ്, പ്ലസ് ടു വിദ്യാര്‍ഥികള്‍ക്ക് ഇത്തവണ 75 ശതമാനം ഹാജര്‍ നിര്‍ബന്ധമാകും. ചട്ട പ്രകാരം 75 ശതമാനത്തില്‍ കുറവ് ഹാജര്‍ നിലയുള്ള വിദ്യാര്‍ഥികളെ പരീക്ഷക്ക് ഇരുത്തില്ലെന്ന് സി.ബി.എസ്.ഇ വ്യക്തമാക്കിയിട്ടുണ്ട്. ഫെബ്രുവരി 15 മുതലാണ് പത്ത്, പ്ലസ് ടു ക്ലാസുകളിലെ പൊതുപരീക്ഷ തീരുമാനിച്ചിട്ടുള്ളത്.

പരീക്ഷയെഴുതുന്നവര്‍ക്ക് ഹാജര്‍നിലയുണ്ടെന്ന് ഉറപ്പുവരുത്തിയ ശേഷം മാത്രമായിരിക്കും അഡ്മിറ്റ് കാര്‍ഡുകള്‍ നല്‍കുക. ഹാജര്‍നില കുറവുള്ള വിദ്യാര്‍ഥികള്‍ ജനുവരിയില്‍ റീജേണല്‍ ഓഫിസുകളിലെത്തണമെന്നും സി.ബി.എസ്.ഇ അറിയിച്ചിട്ടുണ്ട്. അവധികള്‍ സംബന്ധിച്ച് വിദ്യാര്‍ഥികള്‍ക്ക് രേഖകളുടെ അടിസ്ഥാനത്തില്‍ ജനുവരി ഏഴുവരെ അപേക്ഷ നല്‍കാം. ഇത് പരിശോധിച്ച ശേഷമാകും കൂടുതല്‍ തീരുമാനങ്ങള്‍.

പരീക്ഷയില്‍ ജയിക്കണമെങ്കില്‍ തിയറി, പ്രാക്ടിക്കല്‍ പരീക്ഷകള്‍ക്ക് വെവ്വേറെ മാര്‍ക്ക് വാങ്ങിയിരിക്കണമെന്നും ചട്ടമുണ്ട്. സി.ബി.എസ്.ഇയില്‍ 33 ശതമാനം മാര്‍ക്കാണ് ജയിക്കുന്നതിന് വേണ്ടത്. നേരത്തെതില്‍ നിന്നു വ്യത്യസ്തമായി 100ന് പകരം 80ലായിരിക്കും തിയറി പരീക്ഷയുടെ മാര്‍ക്ക് കണക്കാക്കുകയെന്നും സി.ബി.എസ്.ഇ സ്‌കൂളുകള്‍ക്ക് അയച്ച സര്‍ക്കുലറില്‍ വ്യക്തമാക്കുന്നു.