മുംബൈ: റിപ്പബ്ലിക് ദിന പരേഡില്‍ നിന്ന് മഹാരാഷ്ട്രയുടെ നിശ്ചല ദൃശ്യം കേന്ദ്രസര്‍ക്കാര്‍ ഒഴിവാക്കിയത് വിരോധം മൂലമെന്ന് എന്‍.സി.പി എം.പി സുപ്രിയ സുലെ. കേന്ദ്രസര്‍ക്കാര്‍ മഹാരാഷ്ട്രയോട് വിരോധത്തോടെയാണ് പെരുമാറുന്നത്. പ്രതിപക്ഷ പാര്‍ട്ടികള്‍ ഭരിക്കുന്ന മഹാരാഷ്ട്രയോട് കേന്ദ്രസര്‍ക്കാറിന് ചിറ്റമ്മ നയമാണെന്നും സുലെ ട്വിറ്ററിലൂടെ ആരോപിച്ചു.

രാജ്യത്തിന്റെ ആഘോഷമായ റിപ്പബ്ലിക് ദിനത്തില്‍ എല്ലാ സംസ്ഥാനങ്ങള്‍ക്കും പ്രാതിനിധ്യം നല്‍കുകയാണ് കേന്ദ്രസര്‍ക്കാര്‍ ചെയ്യേണ്ടിരുന്നത്. എന്നാല്‍ പ്രതിപക്ഷ പാര്‍ട്ടികള്‍ ഭരിക്കുന്ന സംസ്ഥാനങ്ങളെ ഒഴിവാക്കുകയാണ് കേന്ദ്രം ചെയ്തതെന്നും സുപ്രിയ സുലെ വിമര്‍ശിച്ചു.

ബി.ജെ.പി ഇതര സംസ്ഥാനങ്ങളുടെ നിശ്ചല ദൃശ്യങ്ങള്‍ ഒഴിവാക്കിയത് എന്തുകൊണ്ടെന്ന് വിശദീകരിക്കണമെന്ന് ശിവസേന നേതാവ് സഞ്ജയ് റാവത്ത് ആവശ്യപ്പെട്ടു. മഹാരാഷ്ട്ര സര്‍ക്കാര്‍ ഇക്കാര്യം അന്വേഷിക്കണമെന്നും അദ്ദേഹം പറഞ്ഞു.