ആറ്റിങ്ങല്‍: ദേശീയപാതയില്‍ കോരാണി പതിനെട്ടാം മൈലില്‍ കാറുകള്‍ കൂട്ടിയിടിച്ച് നാലുപേര്‍ക്ക് പരുക്കേറ്റു. ഇന്നലെ വൈകുന്നേരം അഞ്ചു മണിയോടെയായിരുന്നു സംഭവം.
മാരുതി 800 ഉം സ്‌കോര്‍പിയോയുമാണ് നേര്‍ക്കുനേര്‍ കൂട്ടിയിടിച്ചത്. മാരുതി കാറിലുണ്ടായിരുന്ന കൊല്ലം ചാത്തന്നൂര്‍ സ്വദേശികളായ രജിത(22), ഇന്ദിര(56), രാജു(56), എന്നിവര്‍ക്ക് സാരമായി പരുക്കേറ്റു. ഇവരെ തിരുവനന്തപുരം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
സ്‌കോര്‍പ്പിയോയില്‍ ഉണ്ടാ യിരുന്നയാള്‍ക്ക് നിസാര പരുക്കേറ്റു. ഇയാളെ നഗരത്തിലെ സ്വകാര്യ ആശുപത്രിയിലും പ്രവേശിപ്പിച്ചു. പരുക്കേറ്റവരില്‍ രജിതയുടെ നില ഗുരുതരമാണ്. ഇടിയുടെ ആഘാതത്തില്‍ കാറില്‍ കുരുങ്ങിപ്പോയ രജിതയെ ഫയര്‍ഫോഴ്‌സ് എത്തി കാര്‍ വെട്ടിപൊളിച്ചാണ് പുറത്തെടുത്തത്.
മാരുതികാര്‍ തിരുവനന്തപുരത്തുനിന്നും കൊല്ലത്തേയ്ക്കും സ്‌കോര്‍പിയോ കൊല്ലത്തുനിന്നും തിരുവനന്തപുരത്തേയ്ക്കും പോകുകയായിരുന്നു.