ന്യൂഡല്‍ഹി: ആസിയാന്‍ രാജ്യങ്ങളില്‍നിന്ന് ഇന്ത്യയിലേക്ക് ഇറക്കുമതി ചെയ്യുന്ന പാം ഓയിലിന്റെ ഇറക്കുമതി തീരുവ കുറച്ചു. ശുദ്ധീകരിക്കാത്തതും ശുദ്ധീകരിച്ചതുമായ പാം ഓയിലിന്റെ ഇറക്കുമതി തീരുവ 44 ശതമാനത്തില്‍ നിന്ന് 40 ശതമാനമായിട്ടാണ് കുറച്ചത്. കേന്ദ്ര പ്രത്യക്ഷ നികുതി ബോര്‍ഡാണ് പത്രക്കുറിപ്പിലൂടെ ഇക്കാര്യം അറിയിച്ചത്.
മലേഷ്യയില്‍നിന്ന് ഇറക്കുമതി ചെയ്യുന്ന ശുദ്ധീകരിച്ച പാം ഓയിലിന്റെ ഇറക്കുമതി തീരുവ നേരത്തെ 54 ശതമാനമായിരുന്നത് പിന്നീട് 44 ശതമാനമാക്കി കുറച്ചിരുന്നു.
ഇതാണ് ഇപ്പോള്‍ വീണ്ടും 40 ശതമാനമാക്കിയത്. ഇന്തോനേഷ്യയില്‍ നിന്ന് ഇറക്കുമതി ചെയ്യുന്നതിന് നേരത്തെ 50 ശതമാനമായിരുന്നു ഇറക്കുമതി തീരുവ ചുമത്തിയിരുന്നത്. ഇത് മലേഷ്യയില്‍നിന്ന് ഇറക്കുമതി ചെയ്യുന്ന പാം ഓയിലിന്റെ തീരുവയുമായി ഏകീകരിച്ചാണ് ഇപ്പോള്‍ സര്‍ക്കാര്‍ 40 ശതമാനക്കിയത്. ഇന്തോനേഷ്യ, മലേഷ്യ എന്നീ രാജ്യങ്ങളില്‍നിന്ന് ഇറക്കുമതി ചെയ്യുന്ന പാം ഓയിലിന്റെ ഏറ്റവും വലിയ ഗുണഭോക്താവാണ് ഇന്ത്യ. ആസിയാന്‍ രാജ്യങ്ങളുമായി ഇന്ത്യ, സ്വതന്ത്ര വ്യാപാര കരാറില്‍ ഒപ്പുവച്ചതും മലേഷ്യയുമായി സാമ്പത്തിക സഹകരണ കരാറില്‍ ഒപ്പുവച്ചതിന്റെയും അടിസ്ഥാനത്തിലാണ് ഭക്ഷ്യ എണ്ണയുടെ ഇറക്കുമതിയില്‍ ഗണ്യമായ തോതില്‍ തീരുവ കുറക്കാന്‍ തീരുമാനിച്ചത്.
ഇറക്കുമതി തീരുവ കുറച്ചത് ഇന്നലെ മുതല്‍ നടപ്പില്‍ വന്നതായും കേന്ദ്ര പ്രത്യക്ഷ നികുതി ബോര്‍ഡ് അറിയിച്ചു.
അതേസമയം പാം ഓയില്‍ ഇറക്കുമതി തീരുവ കുറച്ച നടപടി ഇന്ത്യയിലെ ഭക്ഷ്യ എണ്ണ ഉല്‍പാദന മേഖലയ്ക്ക് വലിയ തിരിച്ചടിയായിരിക്കും ഉണ്ടാക്കുക. 10 ലക്ഷത്തിലധികം തൊഴിലാളികളാണ് രാജ്യത്തെ എണ്ണ ഉല്‍പാദന രംഗത്ത് ജോലി ചെയ്യുന്നത്.
ലോകത്തിലെ ഭക്ഷ്യ എണ്ണ ഉല്‍പാദക രാജ്യങ്ങളില്‍ നാലാം സ്ഥാനത്താണ് ഇന്ത്യ. അമേരിക്ക, ചൈന, ബ്രസീല്‍ എന്നീ രാജ്യങ്ങളാണ് ഇന്ത്യക്കു പിന്നിലുള്ളത്.
ഇന്ത്യയില്‍ 15,000 ഓയില്‍ മില്ലുകളും 711 സംസ്‌കരണ യൂനിറ്റുകളും 264 വനസ്പതി പ്ലാന്റുകളും 1,000 റീഫൈനറികളും പ്രവര്‍ത്തിക്കുന്നുണ്ട്. മറ്റു രാജ്യങ്ങളില്‍നിന്ന് പാം ഓയില്‍ ഇറക്കുമതി ചെയ്താല്‍ അത് രാജ്യത്തെ ആഭ്യന്തര ഉല്‍പാദനത്തെ സാരമായി ബാധിക്കും.
രാജ്യത്തെ ആവശ്യത്തിന്റെ 40 ശതമാനം മാത്രമേ ഇവിടെ ഉല്‍പാദിപ്പിക്കുന്നുള്ളൂ എന്നാണ് ഇറക്കുമതി തീരുവ കുറച്ചതിനെ ന്യായീകരിച്ചുകൊണ്ട് സര്‍ക്കാര്‍ പറയുന്നത്. ഇതിന്റെ മറപിടിച്ചാണ് കൂടുതല്‍ പാം ഓയില്‍ ഇറക്കുമതി ചെയ്യാന്‍ കേന്ദ്രം തീരുമാനിച്ചത്.
ഇന്തോനേഷ്യ, വിയറ്റ്‌നാം, തായ്‌ലാന്‍ഡ്, മലേഷ്യ, സിംഗപൂര്‍, ഫിലിപ്പൈന്‍സ്, കംബോഡിയ, ലാവോസ്, മ്യാന്‍മാര്‍ ബ്രൂണെയ്, ലാവോസ് എന്നീ ആസിയാന്‍ രാജ്യങ്ങളിലെ പ്രധാനമായും പാം ഓയില്‍ ഉല്‍പാദകര്‍ മലേഷ്യ, ഇന്തോനേഷ്യ രാജ്യങ്ങളാണ്. ലോകത്തെ ഏറ്റവും വലിയ പാം ഓയില്‍ ഉല്‍പാദകരാണ് ഇന്തോനേഷ്യയും മലേഷ്യയും. ഉല്‍പാദിപ്പിക്കുന്ന എണ്ണയില്‍ 55.5 ശതമാനവും ഇന്തോനേഷ്യ കയറ്റുമതി ചെയ്യുമ്പോള്‍ മലേഷ്യ 29 ശതമാനം കയറ്റി അയക്കുന്നുണ്ട്.