റിയാദ്: യമനിൽ ഹൂതികൾ ആറു യുദ്ധ തടവുകാരെ സഊദിക്ക് കൈമാറി. യുദ്ധം അവസാനിപ്പിക്കുന്നതിന്റെ ഭാഗമായാണ് യുദ്ധ തടവുകാരെ യമനിലെ വിമതരായ ഹൂതികൾ കൈമാറിയതെന്നാണ് റിപ്പോർട്ട്. സഊദിക്ക് കൈമാറിയ തടവുകാർ കഴിഞ്ഞ ദിവസം സ്വദേശങ്ങളിൽ എത്തിച്ചേർന്നതായി സഊദി മാധ്യമങ്ങൾ റിപ്പോർട്ട് ചെയ്തു. നേരത്തെ നവംബറിൽ  സഊദി സൈന്യത്തിന്റെ കീഴിൽ പിടിയിലായിരുന്ന128 ഹൂതി തടവുകാരെ റെഡ്ക്രോസ് ഇന്റർനാഷണൽ കമ്മിറ്റിയുടെ മേൽനോട്ടത്തിൽ സഊദി സൈന്യം വിട്ടയച്ചിരുന്നു. ഇതിന്റെ തുടർച്ചയായാണ് തങ്ങളുടെ പിടിയിലുള്ള സഊദി തടവുകാരെ ഹൂതികൾ വിട്ടയച്ചത്. 

 

ഇരുവശത്തും സംഭവിച്ചുകൊണ്ടിരിക്കുന്ന തടവുകാരുടെ മോചനത്തോടെ ഞങ്ങൾക്ക് സന്തോഷമുണ്ടെന്നും ഇത് ശുഭ സൂചനയാണെന്നും ഐസിആർസി (ഇന്റർനാഷണൽ കമ്മിറ്റി ഓഫ് റെഡ്ക്രോസ്) യമൻ തലവൻ ഫ്രിയ റെഡ്‌ഡി പറഞ്ഞു. തടവുകാർ മോചനം നേടി റിയാദ് കിങ് സൽമാൻ എയർബേസിൽ എത്തിച്ചേർന്നതായി സഊദി ദേശീയ മാധ്യമവും സ്ഥിരീകരിച്ചു. എന്നാൽ, ഇവരെ എങ്ങനെയാണ് പിടികൂടിയതെന്നോ മറ്റുള്ള വിവരങ്ങളോ ലഭ്യമല്ല. തടവുകാരെ ഐസിആർസിക്ക് കൈമാറിയതായി ഹൂതി നിയന്ത്രണത്തിലുള്ള അൽ മസീറ ടെലിവിഷനും റിപ്പോർട്ട് ചെയ്തു.