കല്ലമ്പലം: വടശ്ശേരിക്കോണം നരിക്കല്ല് മുക്കിനു സമീപം കഴിഞ്ഞ ദിവസം രാത്രിയില്‍ ബൈക്കുകള്‍ കൂട്ടിയിടിച്ച് ഒരാള്‍ മരിച്ചു രണ്ട് പേര്‍ക്ക് പരുക്ക്.
നാവായിക്കുളം ഇരുപത്തിയെട്ടാംമൈല്‍ പറകുന്ന് രാജി നിവാസില്‍ രവീന്ദ്രന്‍,ശ്യാമള ദമ്പതികളുടെ മകന്‍ രജനീഷ് (രഞ്ചു30) ആണ് മരിച്ചത്. കൂടെ യാത്രചെയ്തിരുന്ന പറകുന്ന് ജസ്മി മന്‍സിലില്‍ ജസ്മിനെയും എതിര്‍ദിശയില്‍ നിന്നുവന്ന ബൈക്ക് ഓടിച്ചിരുന്നയാളിനെയും ഗുരുതരപരുക്കുകളോടെ തിരുവനന്തപുരത്തെ സ്വകാര്യ ആശുപത്രിയില്‍ പ്രവേശിപ്പിച്ചു. രജനീഷ് ശിവഗിരിയിലേക്ക് പോകുമ്പോഴായിരുന്നു അപകടം. എതിര്‍ ദിശയില്‍ നിന്ന് അമിത വേഗതയില്‍ വന്ന ബൈക്ക് നിയന്ത്രണംവിട്ട് ഇടിക്കുകയയിരുന്നുവെന്ന് സമീപവാസികള്‍ പറഞ്ഞു.
സംഭവത്തെ തുടര്‍ന്ന് റോഡില്‍ തെറിച്ചുവീണ മൂവരെയും നാട്ടുകാരും പൊലിസും ചേര്‍ന്ന് അടുത്തുള്ള സ്വകാര്യ ആശുപത്രിയിലെത്തിച്ചെങ്കിലും പരുക്ക് ഗുരുതരമായതിനാല്‍ തിരുവനന്തപുരത്തേക്ക് കൊണ്ടുപോകുകയായിരുന്നു. കൊല്ലത്തെ സ്വകാര്യ മോട്ടോഴ്‌സ് സ്ഥാപനത്തിലെ ജീവനക്കാരനായിരുന്നു രജനീഷ്.