ആറ്റിങ്ങല്‍: വൈദ്യുതി മുടക്കം പതിവാകുന്നത് ആലംകോട് നിവാസികളെ ദുരിതത്തിലാക്കുന്നു. റമദാന്‍ നോമ്പുതുറയുടെ സമയങ്ങളിലും വൈദ്യുതി മുടക്കം പതിവാവുകയാണ്. മുന്‍വര്‍ഷങ്ങളിലും നോമ്പ് സമയത്ത് വൈദ്യുതി മുടക്കം പതിവായിരുന്നുവെന്ന് പ്രദേശവാസികള്‍ പറയുന്നു. പല പ്രാവശ്യവും നാട്ടുകാര്‍ സംഘടിച്ച് കെ.എസ്.ഇ.ബി ഓഫിസ് ഉപരോധമടക്കമുള്ളവ ചെയ്‌തെങ്കിലും ഇനിയും ശാശ്വത പരിഹാരമായിട്ടില്ല. സ്ഥലം എം.എല്‍.എക്കും നിരവധി തവണ നിവേദനം നല്‍കിയിട്ടുണ്ടെന്ന് പ്രദേശവാസികള്‍ പറയുന്നു. വൈദ്യുതി മുടക്കം തുടര്‍ന്നാല്‍ ദേശീയപാത ഉപരോധമുള്‍പ്പെടെയുള്ള സമരപരിപാടികള്‍ നടത്താനാണ് നാട്ടുകാരുടെ തീരുമാനം.