പുതുക്കാട്: പുതുവര്‍ഷ പുലരിയില്‍ യുവതിക്ക് ആംബുലന്‍സില്‍ സുഖപ്രസവം. ഉത്തരേന്ത്യന്‍ സ്വദേശിയയായ ആകാശിന്റെ ഭാര്യ കല്ലൂര്‍ ഭരത പള്ളിവളപ്പില്‍ ഉണ്ണിയാര്‍ച്ചയാണ് ആബുലന്‍സില്‍ ആണ്‍കുഞ്ഞിന് ജന്മം നല്‍കിയത്.
ചൊവ്വാഴ്ച രാവിലെ ആറ് മണിയോടെ പ്രസവ വേദന അനുഭവപ്പെട്ടതിനെ തുടര്‍ന്ന് ഭര്‍ത്താവിനോടൊപ്പം ആശുപത്രിയിലേക്ക് പോവുകയായിരുന്നു.
വഴിമധ്യേ വേദന കൂടിയതിനെ തുടര്‍ന്ന് നായരങ്ങാടിയിലുള്ള സൗഹൃദ യുവസംഗമത്തിന്റെ ആംബുലന്‍സിലേക്ക് മാറ്റി ആശുപത്രിയിലേക്ക് പുറപ്പെടുകയായിരുന്നു.
ജില്ലാ ആശുപത്രിയില്‍ എത്തും മുന്‍പേ യുവതി പ്രസവിച്ചു.
പ്രസവസമയത്ത് ബന്ധുവായ ശാന്തയാണ് ആംബുലന്‍സില്‍ ഉണ്ടായിരുന്നത്. നിര്‍മാണ തൊഴിലാളിയായ ആകാശ്, ഉണ്ണിയാര്‍ച്ച ദമ്പതികളുടെ മൂന്നാമത്തെ കുട്ടിയാണ് പുതുവര്‍ഷ പുലരിയില്‍ ജനിച്ചത്.
അഞ്ച് വര്‍ഷം മുന്‍പാണ് ഉത്തരേന്ത്യക്കാരനായ ആകാശ് ഉണ്ണിയാര്‍ച്ചയെ വിവാഹം ചെയ്യുന്നത്.