അന്തിക്കാട്: തൃശൂര്‍ - കാഞ്ഞാണി സംസ്ഥാന പാതയുടെ നിര്‍മാണം എത്രയും വേഗം പൂര്‍ത്തിയാക്കണമെന്നാവശ്യപ്പെട്ട് സമര്‍പ്പിക്കപ്പെട്ട ഹരജിയില്‍ മൂന്നാഴ്ചയ്ക്കുള്ളില്‍ വിശദീകരണം ബോധിപ്പിക്കണമെന്ന് ഹൈക്കോടതി സര്‍ക്കാരിനോട് ആവശ്യപ്പെട്ടു.
തകര്‍ന്ന ഈ റോഡില്‍ അപകടങ്ങള്‍ നിത്യസംഭവമാണ്. റോഡ് നിര്‍മാണം അടിയന്തരമായി നടത്താന്‍ ആവശ്യപ്പെട് വര്‍ഗീസ് 2016ല്‍ നല്‍കിയ ഹരജിയില്‍ നിര്‍മാണം എത്രയും വേഗം നടത്തണമെന്ന് ഹൈക്കോടതി ഉത്തരവിട്ടെങ്കിലും ഉദ്യോഗസ്ഥര്‍ പണി ആരംഭിച്ചിരുന്നില്ല.
ദുരന്തനിവാരണ നിയമപ്രകാരം റോഡ് നിര്‍മാണം അടിയന്തരമായി പൂര്‍ത്തിയാക്കാനും അതുവരെ റോഡിന്റെ അറ്റകുറ്റപ്പണി നടത്തണമെന്നും ആവശ്യപ്പെട്ട് ഡി.സി.സി സെക്രട്ടറി ഷാജി കോടങ്ങണ്ടത്ത് ജില്ലാ കലക്ടര്‍ക്ക് ഇക്കഴിഞ്ഞ ഒക്ടോബര്‍ 30ന് പരാതി നല്‍കിയിരുന്നു. റോഡ് നിര്‍മാണത്തിന്റെ നിലവിലെ അവസ്ഥയില്‍ അടിയന്തര റിപ്പോര്‍ട്ട് സമര്‍പ്പിക്കാന്‍ ജില്ലാ കലക്ടര്‍ പൊതുമരാമത്ത് വകപ്പ് എക്‌സിക്യുട്ടീവ് എന്‍ജിനീയറോട് ആവശ്യപ്പെട്ടെങ്കിലും നടപടിയുണ്ടായില്ല.
തുടര്‍ന്നാണ് ഷാജി കോടങ്കണ്ടത്ത് ഹൈക്കോടതിയെ സമീപിച്ചത്.ചീഫ് ജസ്റ്റിസ് ഋഷികേശ് റോയിയുടേതാണ് ഉത്തരവ്. തൃശൂര്‍ കുഞ്ഞാണി വാടാനപ്പിള്ളി റോഡിന് 33.6 കോടി രൂപയുടെ ഭരണാനുമതിയാണ് ലഭിച്ചിട്ടുള്ളത്.
2016 ലാണ് ഇതുസംബന്ധിച്ച ഉത്തരവ് പുറത്തിറങ്ങിയത്. ഇതിനു പുറമെ പടിഞ്ഞാറെ കോട്ടമുതല്‍ എറവ് വരെയുള്ള റോഡ് വികസനത്തിന് 22 കോടി രൂപയുടെ സാങ്കേതിക അനുമതിയും ലഭിച്ചിരുന്നു.