അനുരാഗപ്രകടനത്തിന് വഴികള്‍ പലതുണ്ട്. പ്രവാചകനോടുള്ള ഇഷ്ടങ്ങള്‍ കവിതകളായും ഗദ്യങ്ങളായും പ്രഭാഷണങ്ങളായും വരിഞ്ഞൊഴുകുന്നതും ധാരാളം കണ്ടിട്ടുണ്ട്. ഇതില്‍ നിന്നൊക്കെ ഏറെ വ്യത്യസ്തമായിരുന്നു കരീംഗ്രഫിയുടെ നേതൃത്വത്തില്‍ ഒരുക്കിയ അക്ഷരപ്പെയ്ത്ത്.
പ്രവാചക ജന്മദിനം കൊണ്ടാടുന്ന റബീഉല്‍ അവ്വല്‍ മാസത്തിലാണ് കാലിഗ്രഫി രംഗത്ത് ജ്വലിച്ചുനില്‍ക്കുന്ന കരീംഗ്രഫി വ്യത്യസ്തമായൊരു ക്യാംപയിന്‍ ആരംഭിക്കുന്നത്. പ്രവാചകന്റെ നാമം വ്യത്യസ്തമായ ശൈലികളില്‍ കാലിഗ്രഫി ചെയ്ത് ഫെയ്‌സ്ബുക്കിലോ ഇന്‍സ്റ്റഗ്രാമിലോ പങ്കുവയ്ക്കുന്നതായിരുന്നു ക്യാംപയിന്‍.

സ്വയം ഒരു കാലിഗ്രഫി ചെയ്തിടുന്നതിനു പകരം, മറ്റുള്ളവരെ കൂടി പങ്കെടുപ്പിക്കുകയും അവരുടെ കാലിഗ്രഫികള്‍ കൂടി ആളുകള്‍ ആസ്വദിക്കുകയും ചെയ്യട്ടേയെന്ന ഉദ്ദേശമായിരുന്നു മനസില്‍.
സോഷ്യല്‍ മീഡിയ അല്ലേ.. വലിയ പ്രതീക്ഷയില്ലെങ്കിലും എന്തായാലും പുതിയൊരു ഹാഷ്ടാഗുണ്ടാക്കി തുടങ്ങുക തന്നെയെന്ന് തീരുമാനിച്ചു. എന്നാല്‍ തന്റെ ആശങ്കകളെല്ലാം അസ്ഥാനത്താക്കുന്നതായിരുന്നു ക്യാംപയിന് ലഭിച്ച പ്രതികരണം. മണിക്കൂറുകള്‍ക്കകം തന്നെ നിരവധി പേര്‍ വരച്ചിടാനും അയച്ചുനല്‍കാനും തുടങ്ങി. സ്ത്രീകളും കുട്ടികളും തൊട്ട് പ്രമുഖര്‍ വരെ ഈ നിരയിലുണ്ടായിരുന്നു. പ്രശസ്ത മലയാള കാലിഗ്രഫറായ അനൂപ് ചന്ദ്രന്‍, സനീഷ്, ദിലീപ് രാജ് തുടങ്ങിയവരും പിന്തുണയുമായെത്തി. ജര്‍മനി, തുര്‍ക്കി, കാനഡ, യു.കെ, ശ്രീലങ്ക തുടങ്ങിയ രാജ്യങ്ങളില്‍ നിന്നു വരെ ആളുകള്‍ പങ്കെടുത്തു.

ഇങ്ങനെ മൊത്തം നാനൂറില്‍ അധികം വ്യത്യസ്ത കാലിഗ്രഫികളാണ് കുറഞ്ഞദിവസം കൊണ്ട് ആളുകള്‍ വരഞ്ഞിട്ടത്. ഇതോടെയാണ് നാട്ടിലുള്ള നൗഷാദിനെപ്പോലുള്ള സൃഹുത്തുക്കള്‍ കാലിഗ്രഫി എക്‌സിബിഷനെക്കുറിച്ച് ആലോചിക്കാന്‍ പറയുന്നത്. ഹാഷ്ടാഗ് ഏറ്റെടുത്ത പോലെത്തന്നെ എക്‌സിബിഷന്‍ സംഘടിപ്പിക്കുന്നതറിഞ്ഞും വലിയ പിന്തുണയാണ് കിട്ടിയത്. എല്ലാവരുടെയും കാലിഗ്രഫികള്‍ ഫ്രെയിം ചെയ്ത് എക്‌സിബിഷന്‍ കേന്ദ്രത്തില്‍ എത്തിച്ചുകിട്ടി. എക്‌സിബിഷനില്‍ പങ്കെടുക്കാന്‍ വേണ്ടി മാത്രം ഖത്തറിലുള്ള കരീംഗ്രഫി നാട്ടിലേക്ക് വിമാനംകയറി.

പ്രവാചകാനുരാഗത്തിന്റെ അതുല്യദിനങ്ങളായിരുന്നു പിന്നീടുള്ള മൂന്നുദിവസം. സൂഫിയാന സംഗീതവും മൗലിദും ബുര്‍ദ മജ്‌ലിസും ആസ്വാദകരെ കുളിരണിയിപ്പിച്ചു. കോഴിക്കോട് ലോങ് ഹൗസില്‍ നടത്തിയ എക്‌സിബിഷന്‍ കാണാന്‍ പ്രവാചകാനുരാഗികള്‍ ഒഴുകിയെത്തി.
വൈവിധ്യങ്ങളുടെ നിറസങ്കലനമായിരുന്നു കാലിഗ്രഫി പ്രദര്‍ശനം. പല നിറങ്ങളില്‍, അറബി, മലയാളം, ഇംഗ്ലീഷ് തുടങ്ങി പല ഭാഷകളില്‍, പല മതത്തില്‍പ്പെട്ടവര്‍ പ്രവാചകന്റെ ഒരൊറ്റ പേര് അക്ഷരങ്ങളില്‍ വിരിയിച്ചു.

വെറുമൊരു പ്രദര്‍ശനത്തില്‍ ഒതുങ്ങിയില്ല. കാലിഗ്രഫിയെ ഇഷ്ടപ്പെടുന്നവര്‍ക്കു മുന്നില്‍ അവസരങ്ങളുടെ വാതില്‍ തുറന്നിടുക കൂടിയായിരുന്നു പ്രദര്‍ശനം. കാലിഗ്രഫി ക്യാംപയിനില്‍ പങ്കെടുത്തവര്‍ക്കെല്ലാം പേനയടങ്ങുന്ന കിറ്റും സൗജന്യമായി വിതരണം ചെയ്തു. പ്രവാസി സുഹൃത്താണ് ഇതിനായി ധനസഹായം നല്‍കിയത്. ഒപ്പം നിശ്ചിത പേര്‍ക്കായി വര്‍ക്ക്‌ഷോപ്പും സംഘടിപ്പിച്ചു.

ദര്‍സ് പഠിതാക്കളാണ് ക്യാംപയിനില്‍ പങ്കെടുത്ത കൂടുതല്‍ പേരും. കാലിഗ്രഫിയുടെ കലം നാട്ടില്‍ വേണ്ടത്രയില്ലാത്തത് കരിംഗ്രഫിയുടെ ശ്രദ്ധയില്‍പ്പെട്ടിരുന്നു. കാലിഗ്രഫിയില്‍ വലിയ താല്‍പര്യമുള്ളവര്‍ക്കു പോലും അതിലെത്തിച്ചേരാനാവാത്തത് ഈയൊരു പ്രശ്‌നംകൊണ്ടായിരുന്നു. ഇതു പരിഹരിക്കുകയെന്ന ലക്ഷ്യംകൂടിയുണ്ട് ക്യാംപയിനില്‍ പങ്കെടുത്ത നാനൂറില്‍ പരം പേര്‍ക്ക് കലം വിതരണം ചെയ്തതില്‍.

അറബ് നാട്ടിലെന്ന പോലെ കേരളത്തിലും കാലിഗ്രഫിയെ സമ്പുഷ്ടമാക്കുകയെന്ന വലിയ ലക്ഷ്യമുണ്ട് കരിംഗ്രഫിയുടെ പ്രവര്‍ത്തനങ്ങളില്‍. ഭാവിയില്‍ ഒരു ഇന്‍സ്റ്റിറ്റ്യൂട്ട് തുടങ്ങി കാലിഗ്രഫിയെ കേരളത്തില്‍ വ്യാപിപ്പിക്കണമെന്നാണ് മോഹം. നാട്ടിലെ പള്ളികളില്‍ കൊത്തിവയ്ക്കപ്പെട്ട പഴയ കാലിഗ്രഫികളെ വീണ്ടെടുക്കലും മഷിയുണങ്ങിപ്പോയവയെ തിരിച്ചുപിടിക്കലുമൊക്കെ ലക്ഷ്യങ്ങളാണ്.