ഹരിപ്പാട്: കേരളത്തിലെ ജലോത്സവങ്ങള്‍ക്ക് തുടക്കം കുറിക്കുന്ന ചമ്പക്കുളം മൂലം വള്ളംകളി 20ന് ചമ്പക്കുളത്താറ്റില്‍ നടക്കും. മത്സരത്തില്‍ ആറുചുണ്ടന്‍ വള്ളങ്ങള്‍ ഉള്‍പ്പെടെ ഒരു ഡസനോളം കളിവള്ളങ്ങളാണ് പങ്കെടുക്കുക. പതിവുപോലെ ജലോത്സവത്തിന് മുന്നോടിയായി വിഗ്രഹ വിളംബര ഘോഷയാത്രയും സാംസ്‌ക്കാരിക ഘോഷയാത്രയും നടക്കും. വള്ളങ്ങളുടെ രജിസ്ട്രഷന്‍ 13-ാം തീയതി വരെയും 14ന് നറുക്കെടുപ്പിലൂടെ ട്രാക്ക് ആന്‍ഡ് ഹീറ്റ്‌സ് നിര്‍ണയവും നടക്കും. വിളംബരജാഥ 18നും സാംസ്‌ക്കാരിക ഘോഷയാത്ര 19നും നടക്കും. കഴിഞ്ഞതവണ സംഘാടക സമിതി 25 ലക്ഷം രൂപയുടെ ബഡ്ജറ്റിന് അംഗീകാരം നല്‍കിയിരുന്നെങ്കില്‍ ഇത്തവണ 15 ലക്ഷം രൂപയുടെ ബഡജറ്റിനാണ് അംഗീകാരം നല്‍കിയിരിക്കുന്നത്. കേരളത്തിലെ ജലോത്സവങ്ങള്‍ക്ക് തുടക്കം കുറിക്കുന്ന ചമ്പക്കുളം വള്ളംകളിയില്‍ പങ്കെടുക്കുന്നതിനായി വരുംദിവസങ്ങളില്‍ പരിശീലനതുഴച്ചില്‍ നടത്താന്‍ വിവിധ ബോട്ട് ക്ലബുകളും തീരുമാനിച്ചു.