അലനല്ലൂര്‍ : നെല്‍കൃഷിയുടെ പരമ്പരാഗത കാര്‍ഷിക രീതികളും സംസ്‌കാരവും അടുത്തറിഞ്ഞും അനുഭവിച്ചറിഞ്ഞും എടത്തനാട്ടുകര കോട്ടപ്പള്ള ഗവ. ഓറിയന്റല്‍ ഹയര്‍ സെക്കന്ററി സ്‌കൂള്‍ സ്‌കൗട്ടസ് ആന്റ് ഗൈഡ്‌സ് വിദ്യാര്‍ഥികളുടെ കൊയ്ത്തുത്സവം ശ്രദ്ധേയമായി. അലനല്ലൂര്‍ പഞ്ചായത്തിലെ ഭീമനാട് പാടശേഖര സമിതിയുടെ കീഴിലുള്ള വയലിലാണ് കൊയ്ത്തുത്സവം നടന്നത്. നേരത്തെ സ്‌കൗട്ട് വിദ്യാര്‍ഥികളുടെ പ്രാജക്ടിന്റെ ഭാഗമായി തന്നെ ഞാറ് തയ്യാറാക്കുകയും നിലമൊരുക്കി നടീല്‍ നടത്തുകയും ചെയ്തിരുന്നു.
ഞാറ് തയ്യാറാക്കല്‍ മുതല്‍ നെല്ല് സംസ്‌കരണത്തിന്റെ വിവിധ ഘട്ടങ്ങള്‍ വിദ്യാര്‍ഥികള്‍ക്ക് നേരിട്ടറിയാന്‍ ഈ പദ്ധതിയിലൂടെ സാധ്യമായി. കൊയ്ത്ത്, കറ്റകെട്ടല്‍, മെതിക്കല്‍ തുടങ്ങി നെല്ല് സംസ്‌കരണത്തിന്റെ പരമ്പരാഗത രീതികള്‍ കുട്ടികള്‍ക്ക് മുതിര്‍ന്ന കര്‍ഷകര്‍ വിവരിച്ചു നല്‍കി. ഭീമനാട് പാടശേഖര സമിതി അംഗങ്ങളായ കെ. ജയന്‍, കെ. മോഹനന്‍, സ്‌കൗട്ട് മാസ്റ്റര്‍ ഒ. മുഹമ്മദ് അന്‍വര്‍, സി. ജി. വിപിന്‍ എന്നിവര്‍ കൊയ്ത്തുത്സവത്തിന് നേതൃത്വം നല്‍കി. ട്രൂപ്പ് ലീഡര്‍ അസീം സാനു, കമ്പനി ലീഡര്‍ ഫാത്തിമ ഫാരിസ, പട്രോള്‍ ലീഡര്‍മാരായ കെ. അഹ്മദ് ഹനീന്‍, കെ. അഫ്‌സാന്‍, ദേവിക, ഫെമിത സംബന്ധിച്ചു.