കാസര്‍കോട്: വനിതാ മതില്‍ തീര്‍ക്കാനെത്തിയ വനിതകള്‍ക്കു നേരെ ചേറ്റുകുണ്ടിലും ജില്ലയുടെ വിവിധ മേഖലകളിലുമുണ്ടായ അക്രമം ആര്‍.എസ്.എസ്-ബി.ജെ.പി മുന്‍കൂട്ടി പ്ലാന്‍ ചെയ്തതാണെന്ന് ഇടതുമുന്നണി നേതാക്കള്‍ വാര്‍ത്താസമ്മേളനത്തില്‍ ആരോപിച്ചു. ചേറ്റുകുണ്ട്, കുതിരപ്പാടി, തട്ടുമ്മല്‍, കാട്ടുമാടം എന്നിവിടങ്ങളില്‍ നേരത്തെ പ്ലാന്‍ ചെയ്താണ് അക്രമം സംഘടിപ്പിച്ചത്. ചേറ്റുകുണ്ടില്‍ വനിതാ മതില്‍ തീര്‍ക്കാന്‍ വനിതകള്‍ എത്തും മുന്‍പെ റെയില്‍പാളത്തോട് ചേര്‍ന്ന ഉണങ്ങിയ പുല്ലില്‍ മുളക്‌പൊടി വിതറി തീയിട്ടു. റെയില്‍പാളത്തില്‍ നിന്നു കല്ലെടുത്താണ് വനിതകള്‍ക്കെതിരേ എറിഞ്ഞത്. കല്ലെറിഞ്ഞും ബോംബ് പൊട്ടിച്ചും വ്യാപക അക്രമമാണ് ബി.ജെ.പി-ആര്‍.എസ്.എസ് പ്രവര്‍ത്തകര്‍ അഴിച്ചുവിട്ടത്. വനിതകള്‍ക്കൊപ്പം പൊലിസിനെയും മാധ്യമപ്രവര്‍ത്തകരെയും തെരഞ്ഞുപിടിച്ച് അക്രമിക്കുകയായിരുന്നു. കല്ലേറില്‍ രണ്ടു സ്ത്രീകള്‍ക്ക് ഗുരുതരമായി പരുക്കേറ്റ് ചികിത്സയിലായിരുന്നു. ബി.ജെ.പി ജില്ലാ നേതൃത്വത്തിന്റെ സമനില തെറ്റിയ നിലപാടാണ് ഈ അക്രമങ്ങള്‍ക്കെല്ലാം പ്രചോദനം. ബി.ജെ.പി ജില്ലാ പ്രസിഡന്റ് താമസിക്കുന്ന തൃക്കണ്ണാട് വനിതാമതിലിന് അണിനിരന്ന വനിതകളെ അസഭ്യം പറഞ്ഞതായും ഇടതുമുന്നണി നേതാക്കള്‍ ആരോപിച്ചു. അക്രമികള്‍ക്കെതിരേ കര്‍ശനമായ നടപടി സ്വീകരിക്കണമെന്നും അക്രമത്തിനു പ്രേരണ നല്‍കിയ ബി.ജെ.പി ജില്ലാ പ്രസിഡന്റ് അടക്കമുള്ളവര്‍ക്കെതിരേ നിയമനടപടി വേണമെന്നും നേതാക്കള്‍ ആവശ്യപ്പെട്ടു.
നേരത്തെ ആര്‍.എസ്.എസ് കാസര്‍കോട് ഹിന്ദു സമാജോത്സവം സംഘടിപ്പിച്ചപ്പോള്‍ ജില്ലയുടെ വിവിധ ഭാഗങ്ങളില്‍ നിന്ന് ബി.ജെ.പി പ്രവര്‍ത്തകര്‍ വന്നിരുന്നു. അയ്യപ്പജ്യോതി തെളിയിച്ചപ്പോഴും ജില്ലയില്‍ ഒരു കുഴപ്പവും ഉണ്ടായിട്ടില്ല. ഇടതുമുന്നണി സമാധാനം നിലനിര്‍ത്താന്‍ പ്രയത്‌നിക്കുമ്പോഴാണ് ബി.ജെ.പി മനഃപൂര്‍വം കുഴപ്പമുണ്ടാക്കുന്നതെന്നും ഇവര്‍ പറഞ്ഞു. വാര്‍ത്താസമ്മേളനത്തില്‍ ഇടതുമുന്നണി കണ്‍വീനര്‍ കെ.പി സതീഷ് ചന്ദ്രന്‍, സി.പി.എം ജില്ലാ സെക്രട്ടറി എം.വി ബാലകൃഷ്ണന്‍, സി.പി.ഐ ജില്ലാ സെക്രട്ടറി ഗോവിന്ദന്‍ പള്ളിക്കാപ്പില്‍, സി.പി.എം ജില്ലാ സെക്രട്ടേറിയറ്റ് അംഗം വി.കെ രാജന്‍ സംബന്ധിച്ചു.