ബദിയഡുക്ക: വന്യമൃഗങ്ങള്‍ കാട് വിട്ടു നാട്ടിലിറങ്ങി കൃഷി നശിപ്പിക്കുന്നത് പതിവായതോടെ എന്തുചെയ്യണമെന്നറിയാതെ പകച്ച് നില്‍ക്കുകയാണ് കര്‍ഷകര്‍. നേരത്തെ കാട്ടാനക്കൂട്ടം നാട്ടിലിറങ്ങി കാര്‍ഷിക വിളകള്‍ നശിപ്പിച്ചിരുന്നുവെങ്കില്‍ ഇപ്പോള്‍ കാട്ടാന മാത്രമല്ല കര്‍ഷകന്റെ ശത്രു. കുരങ്ങുകളും കാട്ടുപോത്തും കൂടാതെ മയില്‍, മുയല്‍, കീരി തുടങ്ങിയവ കര്‍ഷകന്റെ സ്വപ്നങ്ങള്‍ പിഴുതെറിഞ്ഞ് കൃഷി നശിപ്പിക്കുവാന്‍ തുടങ്ങിയതോടെ ഗത്യന്തരമില്ലാതെ കഴിയുകയാണ് കര്‍ഷകകുടുംബങ്ങള്‍.
ബദിയഡുക്ക, ദേലംപാടി, കുമ്പഡാജെ, കാറഡുക്ക, എന്‍മകജെ, മുളിയാര്‍ പഞ്ചായത്തുകളിലെ വനമേഖലയോടു ചേര്‍ന്നുകിടക്കുന്ന അഡൂര്‍ പാണ്ടി, മയ്യള, ദേലംപാടി, ബെള്ളച്ചേരി, പാണൂര്‍, ഇരിയണ്ണി തുടങ്ങി വിവിധ സ്ഥലങ്ങളില്‍ വന്യമൃഗങ്ങള്‍ വ്യാപകമായി കാര്‍ഷിക വിളകള്‍ നശിപ്പിക്കുകയാണ്. തെങ്ങ്, വാഴ, പച്ചക്കറികള്‍, നെല്‍കൃഷികള്‍ എന്നിവയെല്ലം കാട്ടുമൃഗങ്ങളാല്‍ നശിപ്പിക്കപ്പെടുന്നു.
കൂട്ടമായെത്തുന്ന കുരങ്ങന്മാര്‍ തെങ്ങുകളില്‍ കയറി ഇളനീരുകള്‍ പറിച്ചിടുകയും അടയ്ക്കാ കുലകളും വാഴക്കുലകളും കൊക്കോകളും നശിപ്പിക്കുമ്പോള്‍ മറ്റൊരു വശത്ത് കാട്ടുപന്നികളും കാട്ടുപോത്തുകളും നെല്‍കൃഷി, പച്ചക്കറി, കപ്പ കൃഷികള്‍ അപ്പാടെ നശിപ്പിക്കുന്നു. മയിലുകളുടെ ഭീഷണി നേരിടുന്നത് പപ്പായ, പച്ചക്കറി കര്‍ഷകരാണ്. വിത്ത് വിതച്ച് തൈ ആവുന്നതിനിടയില്‍ കൊത്തി നശിപ്പിക്കുകയാണ് പതിവ്. ഇതോടൊപ്പം അതിര്‍ത്തി പ്രദേശങ്ങളിലെ റബര്‍ മരങ്ങളും കര്‍ഷകര്‍ കൃഷി സംരക്ഷിക്കുന്നതിനുവേണ്ടി കെട്ടുന്ന വേലികളും വലകളും തകര്‍ത്ത് കാട്ടുമൃഗങ്ങള്‍ കൃഷിയിടത്തില്‍ കയറി കാര്‍ഷിക വിളകള്‍ വ്യാപകമായി നശിപ്പിക്കുന്നത് പതിവായിട്ടുണ്ട്.
വന്യമൃഗങ്ങളുടെ ശല്യം കാരണം ചെറുകിട കര്‍ഷകരൊക്കെ കൃഷിയില്‍നിന്നു പിന്തിരിയുകയാണ്.
ബാങ്കുകളില്‍ നിന്നും ധനകാര്യ സ്ഥാപനങ്ങളില്‍ നിന്നും വായ്പയെടുത്ത് കൃഷി ആരംഭിച്ചവര്‍ക്കെല്ലം ഇപ്പോള്‍ തിരിച്ചടിയായി കൃഷി നഷ്ടകച്ചവടമായി മാറുമ്പോള്‍ കാര്‍ഷിക വിളകള്‍ക്ക് സംരക്ഷണമില്ലാതെ അധികൃതരുടെ കനിവ് തേടുകയാണ് കര്‍ഷകര്‍.