കാസര്‍കോട്: ശബരിമലയില്‍ യുവതീ പ്രവേശനം നടന്നതില്‍ പ്രതിഷേധിച്ച് ശബരിമല കര്‍മസമിതി നടത്തിയ റോഡ് ഉപരോധത്തില്‍ അഞ്ചു മണിക്കൂര്‍ ദേശീയപാതയില്‍ ഗതാഗതം സ്തംഭിച്ചു. കറന്തക്കാട് രാവിലെ 10ന് തുടങ്ങിയ ഉപരോധം 12.30വരെ നീണ്ടു. ഇത്രയും സമയം ദേശീയപാതയില്‍ പൂര്‍ണമായും ഗതാഗതം സ്തംഭിച്ചു. പിന്നീട് പ്രകടനമായെത്തിയ പ്രവര്‍ത്തകര്‍ നുള്ളിപ്പാടിയിലെത്തി അവിടെ ഒരു മണിയോടെ റോഡ് ഉപരോധിച്ചു. ഈ ഉപരോധം ഉച്ചയ്ക്ക് 2.30വരെ തുടര്‍ന്ന് ഇത്രയും സമയമെല്ലാം ദേശീയപാത സ്തംഭിച്ചിരുന്നു.
ചളിയംങ്കോട്ടും റോഡ് ഉപരോധിച്ചു
പരവനടുക്കം: കെ.എസ്.ടി.പി റോഡില്‍ ചളിയംങ്കോടും ശബരിമല കര്‍മസമിതി പ്രവര്‍ത്തകര്‍ റോഡ് ഉപരോധിച്ചു. ഇതേ തുടര്‍ന്ന് ഒരു മണിക്കൂറോളം കെ.എസ്.ടി.പി റോഡില്‍ ഗതാഗതം സ്തംഭിച്ചു. പൊലിസെത്തി സമരക്കാരെ അറസ്റ്റ് ചെയ്തു മാറ്റുകയായിരുന്നു.